Форум » Лия кулянь пачтямот(+ды финно-уграньгак) /Другие СМИ (+ финно-угорские) » Истя теезель эрзянь ды мокшонь раськемасторось. » Ответить
Истя теезель эрзянь ды мокшонь раськемасторось.
Эрзянь нилькс: 1922 иень декабрянь 1 чистэ Наркомнацонь Вишка коллегиясь омбоцеде ванкшнызе кевкстеманть Мордовской автономной областенть теемадо. Нать, сень чарькодезь, што истямо нурька шкас (вейке ковонь перть) икелень проектэсь допрок а лиякстомтови – кода васенце толковамстонтькак, коллегиясь таго отказась некеть тувталтнэнь коряс. Сельмс каяты Мордовской подотделсэнть важодицятнень те заседаниясонть а улемаст. Тень, нать, ванкшнома кода сынст ендо октябрянь 31 чинь заседаниясонть кемекстазь а виде решениянть коряс каршо молема. Мель явовты эште вейке тев: РКП(б)-нь ЦК-нь Мордовской секциянь секретаресь 1923 иень февралень 6 чистэ макссь докладной записка национальностень тевтнень коряс наркомонть И.В.Сталинэнь лемс. Тосо сермадовсь: «Мон Тыненк кемекстамс макснинь Мордовской автономной областень проект… Теде мейле ютасть уш кавто ковт, ансяк проектэнть уцяскадонзо мезеяк а маряви. Мон колмоксть снартынь толковамс те кевкстеманть Тынк кедьстэ, ансяк колмоксть монь снартоман ульнесть стяконь». Дивавты се назойчись, конань невтизь эрзянь ды мокшонь раськестэнть лисезетне – национальной автономиянть теемань проектэнть эрямос совавтомо кармавтозетне. Сынь снартнесть нолдамс тевс весементь раськест эсь олясо уцяскаст ладямонтень максозь праватнень топавтоманть туртов. Евтазесь корты седе, што эрзятнень ды мокшотнень национальной государственностень теемань сехте ладиця лувонь вешемась ютась покш пелькстамотнень ды эрьва ендонь толковамотнень пингстэ властень сехте покш прявтнэнь ютксо. Эрзятненень ды мокшотненень се шкастонть эзь удала теемс эсест раськень государственность. Мордовиянь автономиянь теемань кинть лангсо сехте сэрей пирявксокс ульнесь эрзятнень ды мокшотнень аволь ве таркасо эрямост. Неть раськетнень рознявомась пек эзь максо тенст вейсэндявомс, национальной самосознаниянзо кастомс, экономикань коряс башка территориянь явомс. Национальной печатьсэ виев пропаганданть ульнесь покш путовксозо эрзятнень ды мокшотнень политической активностест кастомасо. Сон лездась раськенть самосознаниянзо кастомасо, мезенть ульнесь покш таликазо эрзятнень ды мокшотнень государственностест теемстэ. Эрзятнень ды мокшотнень раськень автономиянть тееманть кисэ агитационно-пропагандистской роботась истямо виевель, што уш 1924 иень июлень 25 чистэ Мордовской автономиянь теемантень анокстамонь лувось таго уш толковавсь РКП(б)-нь губкомтнесэ эрзянь ды мокшонь секциятнень секретартнень вейсэнь промкссонть. Тосо истя жо ульнесть Наркомпроссо, Востоконь раськетнень Центральной издательствасо ды «Якстере теште» газетасо важодиця эрзятне ды мокшотне. Окойники, 1924 иень октябрясто РКП(б)-нь ЦК-нь Секретариатось кемекстызе: эрзятнень ды мокшотнень вейке автономной единицас явомась виде ды шкастонзо. Эрзятнень ды мокшотнень покш бажамост, таркатнесэ партийной ды советской органтнэнь кисэст аштеманть неезь, РКП(б)-нь ЦК-сь ды Советской правительствась макссть кармавтомат ВЦИК-нь Президиумонь комиссиянть роботанзо одс ушодомадо. Уш 1925 иень январьстэ комиссиянтень ванкшномс невтезельть Мордовской автономной областень теемань колмо проектт. Васенце проектэнть теекшнизь Пензань губерниянь важодицятне. Сонзэ коряс арсевсь Мордовской автономияс вейсэндямс Нижегородской губерниянь Лукояновской ды Сергачской уездтнэнь, Ульяновской губерниянь Алатырской ды Корсунской уездтнэнь, Пензань губерниянь Инсарской, Краснослободской, Наровчатской, Саранской, Нижнеломовской, Чембарской, Городищенской, Пензенской, Кузнецкой, Спасской ды Темниковской уездтнэнь. Весе неть таркатнесэ эрясть 1733 тыщат ломанть. Юткстост 55 процентт ульнесть рузт, эрзят ды мокшот – 38 %, татарт ды лия раськень ломанть – 7 процентт. Автономиянь куншкакурокс арсевсь теемс Пенза ошонть. Эрьва ендо толковамодонзо мейле комиссиясь сялдызе те проектэнть. Тень толковизь Пензань губерниясто тензэ весеме ендо пек малавикс Чемберской ды Нижнеломовской уездтнэнь саемадо. Омбоце проектэнть теизе Пензань губерниянь плановой комиссиясь. Сонзэ коряс тешкставсь автономной областентень совавтомс Пензань губерниянь Краснослободской весе уездэнть ды Спасской уездэнь чивалгома пельксэнть. Тосо эрицятнеде ульнесть 420 тыщат, конатнестэ эрзятнеде ды мокшотнеде 52 %, рузтнэде – 43%, татартнэде ды лиятнеде – 5 процентт. Областень куншкакурокс кармаволь Краснослободскоесь. Те проектэсь тусь мельс арсезь областьсэнть весе эрицятнестэ эрзятнеде ды мокшотнеде пеледест ламонь улемасонть. Ансяк сонзэ а кодаль примамс экономикань аволь лезэв енксонзо коряс. Колмоце проектэнть анокстызь РКП(б)-нь ЦК-нь агитационно-пропагандистской отделэнь эрзянь ды мокшонь секциянь прявтось З.Ф.Дорофеев ды ВЦИК-нь Президиумсо Национальной отделэнь инструкторось Т.В.Васильев. Сынст койсэ, Мордовской автономной областентень совавтомаль Пензань губерниянь Темниковань, Спасскоень, Краснослободскоень, Инсаронь, Рузаевкань, Саранскоень уездтнэнь ды Нижегородской губерниянь Сергачонь, Лукояновань уездтнэнь. Проектэнь автортнэнь коряс, областьсэнть эрицятнеде улевельть 804503 ломанть. Эйстэст эрзятнеде ды мокшотнеде – 51 %, рузтнэде – 42 %, татартнэде ды лиятнеде – 7 процентт. Те проектэськак сялдозель сень кувалма, мекс комиссиясь кемекстызе: эрзятнеде ды мокшотнеде тосо ульнесть аволь невтевикс 51 % туро, ансяк 46,2 процент. Теде башка, арсевиця областенть моданзо таргавольть теинестэ 300 вайгельбень кувалмосо чивалгома ендо саезь (Пичкиряево станциясь) чилисема енов (Орданьбуе ошось). Од проектэсь, конань теизе 1925 иень июньстэ ВЦИК-нь Президиумонь подкомиссиясь (прявтось С.М.Диманштейн), тешкстызе автономной областентень совавтомс Пензань губерниянь Темниковань, Спасскоень, Краснослободскоень, Саранскоень, Инсаронь уездтнэнь ды Ульяновскоень губерниянь Орданьбуень уездэнть. Те проектэськак ульнесь аволь вадрятнестэ. Эйсэнзэ мельс апак саельть эрзянь ды мокшонь раськетнень исторической развитиянь башка енкстнэнь ды сынст лия енов а молиця эрямонь лувост. Текенень, эрзятнеде ды мокшотнеде тесэяк улевельть весень эйстэ пеледест аламо. 1925 иень июлень 29 чистэ ВЦИК-нь Президиумось (председателесь М.И.Калинин) ванкшнызе Мордовской автономной областень теемадо комиссиянь невтевкс проектэнть ды яволявтсь, што областенть теемс а кода, секс, мекс тенень арасть эрявикс тувталт. Секс ВЦИК-нь Президиумось мерсь тевс нолдамс Сталинэнь мереманзо. Теде евтазель «О выделении территорий, населенных мордвинами, в самостоятельные административные единицы». Теке шкастонть кемекстазель лоткавтомс комиссиянть важодеманзо – сон эдь эсь тевензэ топавтызе. Ансяк Пензань губерниянь партиянь ды советской органтнэнь мельс те эзь туе. Секс сынь одс, седеяк покш назойчисэ лиссть энялдома марто РКП(б)-нь ЦК-нь ды ВЦИК-нь Президиумов эрзятненень ды мокшотненень автономиянь максомадо. Те кевкстеманть коряс истямо назойчись ушодсь налкставтомо Московонть. Таркатнесэ национальной элитанть ды прявтнэнь ушодксост кардамонть туртов Пензань губернияв кучозельть Центральной контрольной комиссияс совицясь Машидов ды РКП(б)-нь ЦК-нь инструкторось Прокопцев. Тенст максозельть эрявикс полномочият. Сынст вийсэ ютавтозь ванкшноматнень вельде кемекстазель, што Пензань губерниянть таркасо эрзянь ды мокшонь автономиянть теемасонть арась кодамояк смусть. Васняяк, секс, мекс сеть таркатнесэ эрзятнеде ды мокшотнеде весе эрицятнестэ ульнесть ансяк 18 процентт. Сетнеяк эрясть човор рузтнэнь ды татартнэнь марто. Седеяк пек, ванкшномо кучозь чиновниктне кемекстасть, што Пензань губерниянь эрзятнестэ ды мокшотнестэ сехте ламотне эзть аште мордовской автономиянть теевеманть кис ды а неить сонзэ эрявиксчинзэ. Истямо ладсо, таркатнестэ политической элитань представительтнень – Мордовской автономной областень теемань проектнэнь анокстыцятнень, меремс, чумондызь алкуксонь тевтнень а видестэ невтемань кис. Центральной контрольной комиссиясто кучозесь Магидов отчетсонзо мель явовтсь сень лангс, што «автономиянть теемадо кевкстеманть ушолить Пензань губерниянь ды Московонь эрзятнень ды мокшотнень ютксо башка саезь коммунистнэ. Тень пингстэ крестьянтнэнь марто кортнематне ды кой-мезесь лиясь невтить сень лангс, што крестьянтнэ тунь а явить мель автономиядо кевкстематненень. Ды зярдо тень коряс мезеяк теить – ансяк неть коммунистнэнь кармавтомаст коряс». Истямо ладсо ладявсь мель РКП(б)-нь рядтнэсэ таркатнесэ националистической организациятнень улемадонть. Сестэ жо васенцеде марявсть «автономистэнь группа» валтнэ. Сонзэ прявтокс евтазельть ВЦИК-нь Президиумсо национальностень отделэнь инструкторось Т.В.Васильев, Пензань губисполкомсто нацменьшинствань подотделэнь уполномоченноесь С.С.Шишканов ды Пензань губисполкомсто Г.Н.Миронов. «Автономистнэнь» тевдест кевкстемась ванкшнозель 1925 иень ноябрясто ВКП(б)-нь ЦК-нь партколлегиянь покш пленумсо. Ансяк сынст теевксэнть коряс тосо мерезель кода «партиянь лувонть а цидярдома», «партиянть вановтонзо алдо туемс снартома». Тень толковама сеньсэ, што алкукс кодамояк националистической, партиянь каршо молиця вейсэндявкс арасель ды «вере» теде парсте содасть. Эли жо властенть каршо бороцямонть шкасто те «тевентень» эзть яво кодамояк мель ды «нолдызь тормоз лангсо». Эрзятнень ды мокшотнень автономиянь теемадо кевкстемась одс аравтозель ванкшномс РКП(б)-нь ЦК-нь Оргбюрос. Тосо тевенть эрьва ендо ванкшномадонзо мейле 1925 иень августонь 31 чистэ кемекстазель решения, конань смустезэ сеньсэ, што ЦК-сь а моли автономной единицанть явомань каршо. Но ансяк сестэ, «бути тееви цела область, косо вейке таркасо эриця эрзятнеде ды мокшотнеде кармить весень эйстэ пеледест аволь седе аламо». 1925 иень ноябрянь 9 чистэ М.И.Калининэнь прявтсо ВЦИК-сь кемексты мелень явовтыця документ: «ВЦИК-нь Президиумонь Мордовской автономной областень теемадо кевкстемань коряс 1925 иень июнень 29 чинь постановлениянзо одс ванкшномадо». ВЦИК-нь Президиумсо таго тееви комиссия. Ней сонзэ прявтокс аравтови ВЦИК-нь административной отделэнь прявтось Асфендиаров. Комиссиянтень истя жо совасть Белобородов, Диманштейн, Дорофеев, Правдин, Терехов ды, мезе пек эрявиксэль, вейкень-вейкень ломань Ульяновскоень ды Пензань губерниятнестэ. ВЦИК-нь комиссиянтень ванкшномс васняяк невтезельть мордовской автономной областень теемань кавто проектт. Васенцесэнть, «покш проектсэнть», Пензань ды Ульяновскоень губисполкомтнесэ важодицятнень теезесэнть, арсевтевсь автономиянтень совавтомс весе Краснослободскоень уездэнть, Пензань губерниянь Спасскоень, Рузаевкань, Саранскоень уездтнэнь сехте покш пелькстнэнь, Ульяновскоень губерниянь Орданьбуень ды Корсунонь уездтнэнь пелькстнэнь. Те проектэнь теицятне эсест валост кемекстасть сеньсэ, што явовиця таркасонть 847747 ломантнестэ эрзятнеде ды мокшотнеде – 58,2%, рузтнэде – 35,4%, татартнэде ды лиятнеде – 6,4 процент. Ансяк ВЦИК-нь административной комиссиянть ловоманзо коряс, те таркасонть эрицятнеде ульнесть 961845, эйстэст эрзятнеде ды мокшотнеде – 43,4%, рузтнэде – 50,1, татартнэде ды лиятнеде – 4,5 процент. Омбоце, эли «вишкине проектэнть» анокстызе С.С.Шишканов. Сон Мордовской автономной областентень совавтыксэль пек седе аламо таркат Пензань губерниянь некеть уездтнэнь эйстэ. Проектэнь авторонть коряс, тосонь 484771 эрицятнестэ эрзятнеде ды мокшотнеде ульнесть 50,3%, рузтнэде – 41,4%, татартнэде ды лиятнеде – 8,3 процент. Васень проектэнть коряс автономиянь куншкакурокс улемаль Саранскоентень, омбоценть – Рузаевкантень. ВЦИК-нь подкомиссиянть ютавтовкс ванкшноматне кавонест проектнэнь ловизь корязост вешематненень а ладицякс. Васенцесь ульнесь седе паро экономиканть енкстнэсэ, ансяк тунь эзь маштово национальной лувонзо коряс. Омбоце проектсэнть арсевиця областесь ульнесь экономиканть ендо лавшо единицакс. -------------------------------------------------------------------------------- ЭРЗЯТНЕНЬ ДЫ МОКШОТНЕНЬ ГОСУДАРСТВЕННОСТЕНТЬ ТЕЕМАНЬ УШОДКСОСЬ Те иень июлень 16 чистэ топодить 80 иеть Средне-Волжской областенть юрсо Мордовской округонть – эрзятнень ды мокшотнень раськень государственностентень васень эскельксэнть теемстэнзэ. Минь евтнетяно, кода весемесь ушодовкшнось. Ледстясынек ломантнень – раськень се шкань сехте превей, сехте паро представительтнень, конат апак пеле, а мерематнень ды кардамотнень изнязь, тейсть весементь тиринь раськест куватьшкань бажамост топавтомга: эрзятненень ды мокшотненень автономиянть максомантень. Сынь парсте чарькодсть: ансяк истямо ладсо ванстови келесь, культурась, койтне-кирдатне, сонсь раськесь. Эрзятнень ды мокшотнень государственностест улемадо кевкстемась аравтозель центранть, партийной ды советской роботниктнень икеле эште гражданской войнань иетнестэ. 1928 иень майстэ Средне-Волжской областень юрсо теезель Саранскоень округ. Теке иень июлень 16 чистэ ВЦИК-нь Президиумось Средне-Волжской областень «Округтнеде, районтнэде ды сынст куншкакуродост» эсензэ постановлениясонзо кемекстызе округонь теевеманть. Те ульнесь покштояк покш путовксокс эрзятнень ды мокшотнень государственностест теевемасо ды кемекстамосо. Ансяк тевесь таргавсь куватьшкас, явновсь зярыя пельксэв, конатнень ютксо сехте эрявиксэкс ды питнеекс ульнесь ушодксось – Мордовской округонь теевемась. Нама, а седе вишкине таликаст ютавтозь тевтнень, конат топавтовсть Ленинэнь кемекставкс национальной политиканть эрямос совавтомань лувсо. Сонзэ смустезэ мик сехте вишкине раськетненень национальной государственностень максомасо. Тенень анокстамонь тевтне ушодовсть революциядонть мейле сеске. 1917 иень маень 15-22 читнестэ Казаньсэ ютавтовсь Поволжьянь раськетнень Васень вейсэнь промксось. Сонзэ 500 делегатнэнь ютксо ульнесть чувашт, эрзят, мокшот, мариецт, удмуртт, калмыкть, лемдязь татарт, коми-зырянт ды коми-пермякт. Те покштояк покш промксонь протоколтнэнь ванкшномсто неяви: эйсэнзэ важодицятнень сехте покш вешемаст смустезэ ульнесь Россиянь парламентэнь республиканть юрсо весе раськетнень туртов культурной автономиянть максовтомасо. 1917 иень маень 20 чистэ промксонь эрзя-мокшонь секциянь заседаниясонть 14 ломанть тейсть Мордовской культурно-просветительской общества. Те ульнесь эрзятнень ды мокшотнень раськень васенце вейсэндявкс политической олячист емавтомань шкастонть саезь. Вейсэндявксонть теемань ушодыцякс ды сонзэ прявтокс кармасть Ф.Ф.Советкин, В.Н.Колюжнов, Ф.К.Садков, М.М.Кузьмин, Е.Б.Буртаев, П.С.Глухов. Председателекс кочказель М.Е.Евсевьев. Эсензэ васень заседаниясо 1917 иень маень 21 чистэ (ульнесть 18 ломанть), Мордовиянь культурно-просветительской обществась ловизе эрявиксэкс «шкань апак таргсе эрзя-мокшонь съездэнь тердеманть». Примазель постановления Народной просвещениянь министерствав М.Е.Евсевьевень ды Ф.Ф.Советкинэнь кучомадо. Сынь кармавтозельть евтнеме эрзянь ды мокшонь ломантнень майсемадост – те эрявсь, невтемакс, сынст туртов учителень семинариянь панжоманть коряс вешемаст топавтоманть туртов. Ансяк Народной просвещениянь министерствась те энялдомантень мель эзь яво. Апак ютавтоколь «эрзятнень ды мокшотнень съездэськак», конань тешкстазель ютавтомс 1917 иень августсто. Советской Правительствань законодательной васенце актнэстэ вейкесь, конась алтазель национальной кевкстемантень, ульнесь «Россиянь раськетнень праваст декларациятне» (1917 иень ноябрянь 16 (3) чи). Эйсэнзэ толковазель од национальной политиканть лувось: Россиянь весе раськетнень вейкетьксчись ды кидеяк а аштемась; эсест кист кочкамс раськетнень праваст, мик башка явомас ды эсест государствань теемась; национальной ды национально-региональной весе лиятнестэ седе парокс явоматнень ды кардамотнень лоткавтомась; вишка раськетнень ды этнографической группатнень эсь олясо икелев эскелямось. Национальной политикань од лувтнень эрямос совавтомаст туртов 1917 иень октябрянь 26 чистэ Советэнь Всероссийской II съездсэ теезель башка орган – Национальной тевтнень коряс Народной комиссариат (Наркомнац). Прявтокс аравтозель И.В. Сталин. Эрзятнень ды мокшотнень национальной государственностенть вельмевтемань ушодыцякс Октябрьской революциядонть мейле аштесть превей, раськест кисэ аштиця эрзятне ды мокшотне. Истят, кода И.С.Атмашкин, С.Т.Девятаев, Н.И.Игонькин, Т.А.Кирдяшкин, С.С.Шишканов ды лият. Эрзятне ды мокшотне васенцеде весенень марямга яволявтсть эсест бажамодост национальной государственностень теемадо 1918 иень маень 5 чистэ. Те ульнесь Симбирской губерниянь Алатырень уездэнь эрзятнень ды мокшотнень представителень съездсэ. Гражданской войнась эзь максо топавтомс те бажамонть. Ансяк эрзятне ды мокшотне эсест государственностте меленть эзизь стувтне. Теде корты Наркомнацсо 1919 иень февралень 7 чистэ Мордовской отделэнь кемекстамось. Те отделэсь кармавтозель эрзятнень ды мокшотнень национальной государственностенть теемань коряс роботанть ладямо. Гражданской войнанть прядовоманзо апак учо РКП(б)-нь губкомтнень, Симбирскоень, Самарань, Саратовань, Нижней Новгородонь ды Пензань губерниятнень народной образованиянь отделтнэнь, истя жо Мордовиянь литературно-издательской вейке кельстэ омбоцес ютавтыцянь комиссиятнень представительтнень Всероссийской вейсэнь промксов сыцятне (1920 иень июль-август) кемекстызь ушодомс анокстамонь тевенть эрзянь ды мокшонь автономиянь тееманть коряс. Те постановлениянть эрямос совавтомга промксос пурнавозетне Наркомнацонь эрзянь ды мокшонь отделэнь прявтокс кучизь П.П.Башаевень, отделэнь секретарекс – С.К.Марасановонь. Тенст васень тевекс максозель эрзятнень ды мокшотнень национальной государственностенть теемань коряс тевтнень топавтоманть туртов анокстамс учредительной съездэнь тердеманть. Ансяк съездэнть тердемс эзь удала. РКП(б)-нь ЦК-сь арсевтизе васня тердемс эрзянь ды мокшонь раськень коммунистнэнь Всероссийской съезд. Эйсэнзэ снартсть толковамс эрзятнень ды мокшотнень самоопределениядо кевкстеманть, аравтомс национальной государственностень лувонть ды чачонть. Истямо съездэсь ютась Самарасо 1921 иень июнень 10-14 читнестэ. Съездэнтень сакшность 89 делегатт Тамбовонь, Нижней Новгородонь, Пензань, Симбирскоень, Казанень, Саратовань, Самарань, Уфань губерниятнень партийной организациятнестэ. Мордовиянь подотделэнть (кона 1921 иень апрелень 26 чистэ теезь Наркомнацонь Мордовской отделэкс) анокставкс докладонть юрсо съездэсь кемекстызе явомс эрзятнень ды мокшотнень автономной единицас, РСФСР-нь Конституциянтень ладиця управления марто. Подотделэсь мерсь теемс автономной областенть Пензань, Симбирскоень, Тамбовонь ды Нижегородской губерниятнень таркасо, косо умокто умок эрясть эрзятне ды мокшотне. Те меремась раштась пшти пелькстамот съездс сыцятнень ютксо. Самарань парторганизациянь делегатнэ аштесть ансяк Самарань губерниясо автономиянь тееманть кис, Саратовансетне – Саратовсо. Сынь тень кемекстасть енкссост сехте ламо эрзятнень ды мокшотнень эрямосо. Кой-кона делегатнэ ульнесть автономиянть республикань лувсо тееманть кис. Пелькстамотнень ветямсто лангс ливтезель, што эрзятнень ды мокшотнень ламочист, сынст эрямо таркаст съездэнтень а содавикст. Секс мерезель теемс ды кучомс таркатнева башка комиссия, конась бу лововлинзе эрзятнень ды мокшотнень, тонавтневлизе эрямонь лувост, коест, келест. Национальной центральной ды таркатнесэ весе органтнэнь тевест ладямонть туртов Оргбюронь 1921 иень июнень 18 чинь постановлениясо РКП(б)-нь ЦК-со теезель эрзя-мокшонь секциянь центральной бюро. Эйзэнзэ совавтозельть Д.С.Желтов, М.Е.Евсевьев, И.И.Московкин, В.П.Климкин. Весе губерниятнень пельде бюронтень совавтозельть 25 ломанть. Те органось ладясь РКП(б)-нь губерниянь ды уездной комитетнэсэ се шкантень ламо эрзятнень ды мокшотнень малав весе эрямо таркатнесэ теезь эрзя-мокшонь секциятнень роботаст. Съездэнть решениянзо коряс теезь комиссиясь, козонь совасть Д.С.Желтов, М.Е.Евсевьев, Ф.И.Завалишин, Т.В.Васильев, И.И.Московкин, Г.К.Ульянов, Е.С.Окин, 1921 иень июлень 14 чистэ кундась автономиянь проектэнь тееме ды тень туртов эрявикс материалонь пурнамо. Этнической енкстнэнь мельс саезь, административной границятнень ладямс а кодаль. Те кармавтынзе прявтнэнь «национальной размежеваниянь» тееме тердемс этнографтнэнь ды лия специалистнэнь. Тевенть топавтомсто мель явовсь кавто енкстнэнень: лиятнень коряс седе ламо эрзятнень ды мокшотнень улемась ды теевиця автономиянть экономиканзо виевгавтоманть туртов эрявиксэсь. 1921 иень сентябрянь 1 чистэ ВКП(б)-нь ЦК-нь эрзянь ды мокшонь секциятнень центральной бюронь заседаниясо Наркомнацонь Мордовской подотделэнь прявтокс аравтозель Д.С.Желтов. Те таркасонть улемстэнзэ сон маштсь пурнамс пек паро коллектив, конась ушодсь виевстэ важодеме автономиядо кевкстеманть топавтоманть коряс. Наркомнацонь Мордовской подотделэсь анокстась проект эрзятнень ды мокшотнень автономиянь явомадо се таркасонть, косо ульнесть Пензань губерниянь Краснослободскоень, Инсаронь, Саранскоень, Рузаевкань уездтнэ, Тамбовонь губерниянь Темниковань ды Спасскоень уездтнэ, Симбирскоень губерниянь Орданьбуень ды Алатырень уездтнэ. Мельс саезельть неть таркатнесэ эрзятнень ды мокшотнень ламонь-ламонь эрямост, сынст ды шабрань раськетнень мелест. Арсевсь теемс Мордовской автономной область. Автономиянь куншкакуронть арсевсь теемс Рузаевкасо – весе неть таркатнень вейсэндиця чугункань кинь покш сюлмавкссонть. 1922 иень октябрянь 5 чистэ те проектэсь невтезель Наркомнацов ванкшномс. Эдь те ведомствась сермалесь положеният автономиятнеде ды ладясь сынст границяст. Октябрянь 31 чистэ национальностнень тевест коряс народной комиссариатонь вишка коллегиясь (козонь совасть Г.Е.Брейд, Г.К.Клингер ды М.Л.Павлович (М.Л.Вельтман) яволявтсь: невтезь тенст материалтнэ аволь сатышкасто анокстазь. Текенень, неть таркатнесэ Мордовской автономной областень тееманть туртов арасть эрявикс тувталт. Документэнь теицятне чумондовсть сеньсэяк, што теемс арсевиця автономиянть границятнеде апак кортаколь неть губерниятнень прявтнэнь ды РСФСР-нь Внутренней тевень Наркоматонть марто. Истямо ладсо, Мордовской автономиянть теемадо проектсэнть, Наркомнацонь Вишка коллегиянть мелензэ коряс, ульнесть ламо асатыкст, мезень коряс сонзэ а кода ульнесь кемекстамс. "Эрзянь правда" сёрмадкс паргостонзо.
Ответов - 0
полная версия страницы