Форум » Сёрмадоматев/Литература » Кодамо тантей эрзянь пачалксесь… » Ответить
Кодамо тантей эрзянь пачалксесь…
Эрзянь нилькс: Кодамо тантей эрзянь пачалксесь… Кодамо тантей эрзянь пачалксесь… Кода качады ансяк педязь ловсось, Кодамо лембе панезь прякинесь, Кодат ламбамот авань сюкоронзо… Лембе варьгатне тонгозь кедезэть, Лембе кудось, конасонть ават-тетят, Тия ялгат мартот кепе чийнесть, Тесэ пильгеть моданть лангс чалгасть… Кодат тесэ валдот валскеть, Кодат тердицят чопода чокшнэтне, Тов, косо рангить веньперть атёкшкеть, Тов, кува ойметь ливти менель верьга… Бути чарькодик ойметь мелявксонть, Бути ванстат седейсэть тиринь авать чаманть, Сестэ иля стувто эрзянь келенть! Иля мие эсь Эрзя раськень лементь! Эрюш Вежай. Полярной ош, суньдерьков, 2 чи.
Ответов - 3
Сантяй: Вечкевикс Эрий! Мон пек абунгадынь, зярдо неия, те стихенть сёрмадызе Поваделень ава. Те стихенть сёрмадызе Стегней Ольга (Ольга Егоровна Слугина) Атяшева райононь Сабанцелестэ. Печатазель те сёрмадовксось "Вперед" райононь газетасонть. Те авадонть НТВ теекшнэсь репортаж, келя реп сёрмады. Авась кулось колмошка иеть кода. Косто саинк, те Поваделень ава?
Эрзянь нилькс: Сантяй пишет: Поваделень ава. Те стихенть сёрмадызе Стегней Ольга (Ольга Егоровна Слугина) Атяшева райононь Сабанцелестэ. Печатазель те сёрмадовксось "Вперед" райононь газетасонть. Вития, Сантяй! Сюконямот теть.
Эрий: Вай, сыречи… Вай, сыречи, кажочи, Тон а учат – сон а сы. А нейсакак кода сови, Шумбрачить весе сайсы Кедеть-пильгеть сэредить, Кургсо пееть певерить, Чама бокат сормсевить, Прок човарсо томбсевить. Пилеть потомить – а марить, Сельметь беряньстэ неить. Рунгот мик кичкерьгады. Тюсотак а мазылгады. Чавачань икелев стян, Неян а мазы ломань. Пенсиянть максовлия, Одксшкам рамавтовлия. Пенсиянть кода кандсызь, А нейсак, кода сайсызь. Эсеть лангс весе пижнить, Мокшнасост мик тандавтнить. Весеменень тон мешат, Кекшемс козонь а содат. Молян церантень кекшан – Тосо урьвантень мешан. Тейтерем кедьсэ эрян, Вай, содамодонть пелян. Ох, сыречи, кажочи, Кадомакак куш ве чи. Каштлангстояк мусамак, Тосояк авардьсамак. Арсян, теке иредян, А мон истя—сыредян. Ой, сыречи, тонь кувалт, Киненьгак а эряван. Ох, эйкакшкеть-тякинеть, Кода мон тынк тиридизь, Тетявтомо кастыдизь. Саласкесэ пенгть усксинь, Лембе кудо тенк уштнинь. Копорьсэнь тикше кандтнинь, Истя скалнэ мон андынь. Чинек-венек важодинь, Нармунь ладсо тынк андынь. Мельсэнь, кувать а мадян – Лембе носкат тенк кодан. Ней тыненк а эряван, Ят ломанекс маряван. Мон эстень тарка муян, Сыречинь кудос туян. Марятадо – мон кулан, Пачкоди тыненк кулям. Лангам вадрят кортадо, Чевте валнэть ёвтадо. Куломаськак малав сы, Пазось конёвне кучи. Апак сода сайтянзат, Нолдамс—а нолдатанзат. Одксчись леди мелезэть. Сельведеть прыть элезэть. Кода вирьга якилинь, Умарь ведрат канднилинь. Тикше улав кандтнилинь, Сизема а содылинь. Ловось солы – кизэ сы – Од шкась одс а велявты. Те стихенть сёрмадызе Стегней Ольга (Ольга Егоровна Слугина) Атяшева райононь Сабанцелестэ. Печатазель те сёрмадовксось "Вперед" райононь газетасонть.
полная версия страницы