Форум » Сёрмадоматев/Литература » Эрюш Вежай. Ёвтнемат, валморот. » Ответить
Эрюш Вежай. Ёвтнемат, валморот.
Эрзянь нилькс: Эрзятнеде вал Минь – теке нармунть пизэвтеме Ливтнетяно ды майсетяно… Лия масторга оймень пиемс Паронь вешнемстэ ёмсетяно. Эрзянь Масторонок, сон яла, Прок теле малав кадозь пизэ Тарьди-пишти кандылов ало, Пели кемемс – таго сы кизэ. Кить теньсэ чумот? Сеть эрзятне? Кинь прятне туремасо прасть? Кинь ашо кезэрь ловажатнень Пиземеть эрьва кизна шлясть? Арась, эрзят. Сынь – тевест теизь, Ды кемсть эсь цёраст-нежест лангс.. А минь?…Эрятано знярс – пелезь, Яттнэсэ сезнезь нула панкст! Ки ёвты тень – зяро цидярдомс? Кезэрь леменек стувтомас?! Эли минек шумбра аватне Шачтнеме цёрынеть лоткасть?! Арседе, эрзят, пек домкасто… Кода вельмевтемс оляксчинть? Кода каштанчинек велявтомс? Ды изнямс налкставт уречинть! Эрюш Вежай________________________________________ Erzätnede val Min – teke narmunjt pizqevteme Livtnetäno dy maisetäno... Lija mastorga oimen pijems Paronj veshnemstqe maisetäno. Erzän Mastoronok, son jala, Prok tele malav kadozj pizqe Tarjdi-pishti kandylov alo, Peli kemems - tago sy kizqe. Kit tensqe chumot? Set erzätne? Kin prätne turemaso prasjt? Kin asho kezqer lovazhatnen Pizemet erjva kizna shläsjt? Arasj, erzät. Syn – tevest tejiz, Dy kemsjt es cörast-nezhest langs.. A min?...Erätano znärs – pelez, Jattnqesqe seznez nula pankst! Ki jovty ten - zäro cidärdoms? Kezqer lemenek stuvtomas?! Eli minek shumbra avatne Shachtneme cörynet lotkasjt?! Arsede, erzät, pek domkasto... Koda velmevtems oläkschint? Koda kashtanchinek velävtoms? Dy iznäms nalkstavt urechint!
Эрзянь нилькс: Танюш пишет: Моньгак вечктян Муса Джалилень валморот,
Эрзянь нилькс: Ваньксчинь сравтнема. Кода иля арсе-тее, ялатеке улить тевть аваломанень, улить – цёраломанень. Цёратне теить –топавтыть сеть тевтнень, конат вешить вийть, виень путомат, конатнеде цёратнень копорест начкить ливеькадомадо, псилгадомадонть начкить ливезьденть панартнэнь кутьмерест-лавтовост, кавалалксост, мештест. Кить теде мейле муськсызь-валакалесызь цёратнень оршамост? Нама, минек аватне. Аватнестэ моли ваньксчись. Сынь муськить-лопавлить оршамотнень-ацамотнень. Мейле сравтнить сынст костямо пикска. Тельняяк, кизнаяк. Нейгак сельмем икеле шлямочинь аваломанень тевтне. Баня уштыть, ведь канднить, муськить-лопавлить. Зярдо цёратне сыть паксясто, тенст сави ансяк кайсемс, саемс анокстазь ванькс оршамотнень ды туемс явавтозь баняв. Зярс сынь тосо шлить-парить, аватне прядсызь муськемаст. Ней сехте мельс валдо тев – мускимань сравтнема. Окойники аваломанесь видемтьсы рунгонзо, сэставтсы сизезь карязонзо, нардасынзе икельць пацязонзо начко, сапонденть лоподезь кедензэ. Кепедьсы муськима марто ашо кшнинь керезенть ды лиси кардазов муськиматнень сравтнемест. Кодат мазыйть тень пинстэ эрзянь аватне! Рунгост видеть! Чамаст валдот! Сельмест цивцёрдыть тевень топавтома кенярксчинь валдосо. Кедест, тодов лангакстнэнь марто, неявить теке келемтезь ашо локсеень сёлмокс. Рестедьсызь ашонть, теке ливтямо снартыть! Платияст тень пингстэ кепедевить аламнешка верев ды панжить седе верев сынст кеме, мазыйде мазый, ашо лов тюсонь пильгест… Сельметькак эйстэт а саевить, салавине варштазь… Монень пачк марявсь. Те истя аватне аволь муськимат понгавтнить, сынь сравтнить истяня сонсензэ Модамасторонть ВАНЬКСЧИНЗЭ… Улема, секскак истямо тантей ваньксчисэ качадыть одс ацазь ацамотне, конатнес ваязь ваят эрзянь банядо мейле? Матедевемстэ лембе удома сувонть пачк таго неят, кода мазый рунго эрзянь ава ашо кедьсэнзэ сэнь менельганть сравты валдо Ваньксэнть… Эрюш Вежай 2010 ие, панжиков.
Танюш: Эрзянь нилькс пишет: Матедевемстэ лембе удома сувонть пачк таго неят, кода мазый рунго эрзянь ава ашо кедьсэнзэ сэнь менельганть сравты валдо Ваньксэнть… очень поэтично написано!!!
Эрзянь нилькс: Танюш пишет: очень поэтично написано!!! Сюконян, Танюш. Те мельморось (новелла) алтави минек эрзянь аватненень... Улест шумбат, улест мазыйть, улест вечкевть...
Танюш: Эрзянь нилькс, тонеть сюкпря - эрзянь аватнень пельде!!!
Терюшань Сергу: Эрюш, чумом нолдык те сермадксонть кувалма)) Сермадмось тонть виде ды мазы, ансяк вана ме тень мельсь сась. Ловныя ды чарькодинь мекс эрзятене истя баня пек вечкить)) Ашо эрзянь рунго лангсто пек рудазось неяви, секс сонзэ эряви парстине шлямс, рунгонть мекев ашолгавтомс, пси банясь килеинь тенсть марто вадрясто те тевенть теи, левшесь седияк тевенть прядсазо. Эрзянь авась те тевенть парсте содызе ды кармась ашот панарт, сустамо эстензэ ды мирде-церанте, таго рудазось лангсто неяволь, сеск оршамопельтнень мускемс-ёвардомс ды мекев оршамокс маштови. Эрьва чистэ авась чисти, "чиста" теи перьпельганзо. Сюкпря теть Эрюш!!
Эрзянь нилькс: Терюшань Сергу пишет: Эрзянь авась те тевенть парсте содызе ды кармась ашот панарт, сустамо эстензэ ды мирде-церанте, Виде.
Эрзянь нилькс: Пек илядо шна! Минек аватненень эряви эрьва чистэ морот арсемс! Ансяк сынь шачнить эрзя левкст...
Терюшань Сергу: Эрзянь нилькс пишет: Ансяк сынь шачнить эрзя левкст... Авась касты-три РАСЬКЕ!
Эрзянь нилькс: Вирень инзейне. Мейсь, вирень инзейне, човордык седеем? Мейсь талакавтык оймем? Вирень кужосонть, якстерестэ кенерезь, Кольнят-налксят икелем. Вакскат а ютават, чиезь а ношкстават, Танстеть чаракавты прям, Венстяса кедем, тонсь якстере байгинекс, Паморькскекс прат кедезэм… Эрюш Вежай 2010 ие, медьков.
Танюш: Эрзянь нилькс, валморот пек тантей!!!
Эрзянь нилькс: Танюш пишет: Эрзянь нилькс, валморот пек тантей!!! Сюконян мелеть кис!
Инзейне: Пек паро валморось,седеем токизи.Сюкпря Эрьзянь нилькс тоеть.
Эрзянь нилькс: Инзейне пишет: Пек паро валморось Сюконямот!
Эрзянь нилькс: Бабинетне эрзякс кортыть… Косто марямс эрзянь келенть?... Эрзянь велев ардодо, Ало пева, Вере пева Ютадо… Кунсолодо… Бабинетне эрзякс кортыть Вальма ало озадо… Вейкесь обмоценть кавани Прякадо ды позадо… Тона суски, поза коршты, Памшты-теи, киведи: -Кода теить? Мезе путыть?- Шабранть кевкстни ялгазо… - Кода паневсть истят тантейть? Келеськак ва нилеви!- - Исяк чокшнэ чапакс путынь, Валскес парсте сыргазо… Каинь комоляведь, оргат, Ичинь кедьсэ, скалкасо… Тапинь алнэть, каинь ойне, Мерькинь ашо модамарть, Теинь весе авань койнекс, Тензэ чансть Паз максозо…- Бабинетне эрзякс кортыть Вальма ало озадо, Кортыть мазый эрзянь кельсэ... - Састыне… Кунсолодо… Эрюш Вежай 2010 ие, медьков
Танюш: Эрзянь нилькс пишет: Бабинетне эрзякс кортыть Вальма ало озадо, Кортыть мазый эрзянь кельсэ - Састыне… Кунсолодо… Пек вадря!!!!! Сюконян валморот кис модас!
Эрзянь нилькс: Танюш пишет: Пек вадря!!!!! Сюконямот, Вирява! Учан од арсевкст-сёрмадовкст тонь кедеть алдо...
Александр: Бабинетне эрзякс кортыть...http://video.mail.ru/mail/sidalex1972/_myvideo/34.html
Инзейне1: Эрьзянь нилькс,сюкпря паро валморот кис,мон маринь Чукал велесэ ,кода бабинетне кортась эрзякс,парсте кортасть,седеем эждевсь,
Эрзянь нилькс: Сюконян...
Эрзянь нилькс: Витькстамо. Секс, мекс Тон монень эряват, Секс, мекс Мон тонь вечктян. Секс, мекс Мон тонеть эряван, Секс, мекс Мон тонь вечктян. Секс, мекс Эрят тон седейсэм, Секс, мекс Мон тонь вечктян. Секс, мекс Тон совить оймезэм, Секс, мекс Мон тонь вечктян. Секс, мекс Тон аштят сельмесэм, Секс, мекс Мон тонь вечктян. Секс, мекс Минь тонь марто вейсэ, Секс, мекс Мон тонь вечктян. Секс, мекс Палымик тон эйсэм, Секс, мекс Мон тонь вечктян. Секс, мекс Сась тенек уцяскась, Секс, мекс Мон тонь вечктян. Секс, мекс Тон течи монь вакссом, Секс, мекс Мон тонь вечктян. Секс, мекс Мон течи тонь вакссот, Секс, мекс Мон тонь вечктян. Секс, мекс Чизэ течи маней, Секс, мекс Мон тонь вечктян!! Эрюш Вежай (аламодо пеедезь....)
Инзейне1: ПАРО!
Маол: Рузтнэ а чаркодить
Эрзянь нилькс: Александр пишет: Бабинетне эрзякс кортыть Пек вадря эриванмось, Александр. Мелезэм тусь...Маол пишет: Рузтнэ а чаркодить Теде весе мелявтомам... Истя мелявтан...
Эрзянь нилькс: Авакшонь ёжо… Псидеяк пси чи… Покшонь покш ошонь куншка… Асфальтсо вельтязь ошонь келей кись теке пси пачалго томба лангсо… Колмо рисьмесэ апак лотксе кеверить урнозь-ирнэзь ардымтне-машинатне… Кудо озяз авакшось левксэнзэ марто ливтясть ошонь келей кинть трокска… Левксэсь ливтясь лавшинестэ, алга-алга… Сэльшка эзь ливтяво кинть трокска, валгсь витьстэ кинть лангс… Вансь каршонзо ардыця качамов ардымтнень лангс… Авакшось сеск валгсь ваксозонзо… Вейке машинась ювк тейсь ды ютызе озяз левкскенть вакска… Авакшось либордозь кепететьсь кинть вельксэс… Омбоце ардымесь ювк тейсь ды ютась озязкенть вакска… Авакшось талакалезь ливтнесь левксэнзэ велькса… Колмоце стака дырныгаесь, мезеяк апак нее, ютась витьстэ се таркаванть, косо озадоль озяз левкскесь… Пси асфальтонть лангс кадовсь ансяк начко верь петнявкске ды толгинень тапавкске… Озяз авакшось эрьва машинанть мельга валгокшнось толга тапавкскенть ваксс ды талнозь-чоледезь тердсь толгинень верь тапавкскенть ливтямо тов, косо кассть тусто куракшт… Истя авакшось ливтнесь суньдерьгадомас… Эрюш Вежай 2010 ие, медьков
Эрзянь нилькс: Кода эрзятне лемдить-тешкстнить ШКАНТЬ молеманзо? ШКАСЬ – те Инешкипазонь арсевксэсь-теевксэсь. Секскак эрзянь кельсэнть ванстовсь кезэрень кевкстема парцунось. Эрзятне а кевстнить истя: - Зяро шкаСЬ?. Эрзятне пачк кевкстнить: - «Зяро шкаЗО?» . Сонзэ, Инешкипазонть, ШКАЗО… Шка…Шка.. Шка… Те валсонть марявить шканть молема кашторксонзо… Шаштомазо… Ювкадемазо… Сехте покш шкань ютконтень эрзятне мерить ПИНГЕ. Пингенть кувалмазо покш. Ули ловома пинге. Эйсэнзэ 100 иеть. Ули ЭРЯМО ПИНГЕ. Эрямо пингесь онксты ломаненть эли меньгак эриксэнть эрязь пингензэ. Пинге… Пинге… Пинге… Гайтев валось. Гайги налчирькень свисть сурекс-тетивакс. Пиннньк… ды кивчкадсь эрямо пингесь нолдазь налокс… Азё муик… Косо сон?... Седе вишка шка пельксэнтень эрзятне мерить ИЕ… Мазый валось… Аволь валгак. Моро… Ие… Ие… Ие… Эйсэнзэ эрить ТУНДОСЬ…. КИЗЭСЬ… СЁКСЕСЬ… ТЕЛЕСЬ… Эрьва ие пельксэнть эсензэ моронзо… Эрьванть эсензэ гайтезэ… Ютазь иентень эрзятне мерит МЕЛЯ… МЕЛЯТ… Ютась иесь… Ансяк ломаненть мельсэ сон кадовсь ды тосо эри… Мелянь тевтне зярс шождасто лецтявить, мельс пракшныть-саевить… Омбоце ютазь иентень эрзятне мерить МАНЫ… Маны, те уш аволь меля… Те седе умок… Мельсэяк аволь весе ютазденть кадовсь… Аволь весе лецтяви, мельс сы-саеви… Колмоце ютазь иентень эрзятне мерить МАНЫДЕ ИКЕЛЕ… Те иесь уш алкукс УМОНЬ… А вана кода ютыть ПИНГЕДЕ ламо иеть, сеть шкатненень эрзятне мерить КЕЗЭРЕНЬ ПИНГЕТЬ… Мазый, гайтев эрзянь валось - КЕЗЭРЕНЬ! Косто сон саевсь минек келентень? Истямо сон гайтев, теке васоло пургинень зэртьке, кона пачкодсь пилезэть ды кеверезь кевери тей-тов прясот-пилесэть: КЕЗЭРЕНЬ... КЕЗЭРЕНЬ... КЕЗЭРЕНЬ... Теке аволь валгак, цела ёвкс, конасонть маряви Эрзя раськенть ютазь эрямопингезэ. Эйсэнзэ эрить виев эрзянь цёрат-маралят, мазый эрзянь тейтерть-ават, минек пазтнэ - Инешки Паз, Пургине Паз, Кардаз Сярко... Те валось сеедьстэ сюлмави истямо валсюлмавксос: КЕЗЭРЕНЬ КОЙ, КЕЗЭРЕНЬ ШКА, КЕЗЭРЕНЬ МОРО, КЕЗЭРЕНЬ ЁВКС... Ванкшносынек валонть теема лувонзо. Койсэм КЕЗЭРЕНЬ валось эрзянь кельсэнть эри пек умонь шкатнестэ, КЕЗЭРЕНЬ шкатнестэ. Теевсь сон кавто валсто: КИЗЭ+ЭРЕНЬ. КИЗЭ валось эрзятненень чарькодеви. Теке эрзянь валось, аламодо полавтовозь, ули суоминь ды мокшонь кельтнесэ. Суоминь кельсэнть сонзэ зэмезэ-смустезэ секе - КИЗЭ. Мокшонсесэнть смустезэ полавтовсь, смустезэ - ИЕ. Мари раськень кельсэнть истяяк ули КИЗЭ валось. Зэмезэ эрзянсенть марто вейке. А вана ЭРЕНЬ валось ней истямо чачосо неень шкань эрзянь кельсэнть а вастневи. Сон теевсь ЭРЯМС валстонть. Неень шкасто минь мертяно ЭРЯНЬ, сеть тевтнеде, конат ЭРЯМОСТОНОК ютасть, тусть удалов, кадовсть удалонок, ютазь читнесэ-иетнесэ, ютазь шкасонть. Вана истя теевсь ды ванстовсь минек эрзянь кельсэнек те мазыйде мазый, теке моро, эрзянь валось - КЕЗЭРЕНЬ, рузокс - ДРЕВНИЙ. Иенть эрзятне явтыть КОВОНЬ-КОВОНЬ. Иесэнть кемкавтово КОВТ. Те ней. Койсэм, икеле эрзятне иесэнть ловсть кемколмово КОВТ. КОВ… Мазый валось… Эйсэнзэ пачк неяви сияждыця ков валдось… Иесэнть кемкавтово ковт: ЯКШАМКОВ – те ковось, зярдо эрьва чистэ – цят якшамо. ДАВОЛКОВ – учок, эрзя, ловонь даволт-бурят. ЭЙЗЮРКОВ – лато ды кудо прятнестэ чить кольги, теевить эй сюрот. ЧАДЫКОВ – лейтне кармить чадомо. ПАНЖИКОВ – виртнева, паксятнева панжтыть цецят-чувтт. АШТЕМКОВ – эрзятне зярыя шка аштить-оймсить сокамодо-видемадо мейле. МЕДЬКОВ – эрзятне таргить медь, ярсыть медьте. УМАРЬКОВ – кенерить умарьтне ды лия марьтне-эмежтне. ТАШТАМКОВ – эрзятне теить таштавкст сы телентень. ОЖОКОВ – сёксесь ожолгавты вирьтнень. СУНЬДЕРЬКОВ – читне нурькинеть, суньдерькстнэ кувакат. АЦАМКОВ – телесь сась ды ацызе моданть ашо ванькс ловсо. Ковонть эрзятне явтыть истя: КАСЫ КОВ, ПЕШКСЕ КОВ, МАШТЫ КОВ, КОВТОМО ВЕ (СОКОР ВЕ)… Лисни, явтыть ковонть ниле ТАРГОС. ТАРГОСОНТЬ – сисем ЧИТЬ: АТЯНЬЧИ, ВАСТАНЬЧИ, КУНШКАЧИ, КАЛОНЬЧИ, СЮКОНЬЧИ, ШЛЯМОЧИ, ТАРГОЧИ. Атяньчистэнть кудораськень прявтнэ-атятне макстнить тевть цёраломантненень. Вастаньчистэ сыряватне макстнить тевть аваломантненень. Куншкачись тешксты таргонть куншканзо. Калоньчистэ эрзятне сюконильть Ашо калавантень ды пидильть штюрьба. Сюконьчистэ эрзятне кундыть тоначив туезь покштятнень-сэрдятнень лемест. Шлямочистэ – шлить банясо. Таргочистэ – оймсить аламодо эрьвачинь тевтнестэ. Ютазь чинтень эрзятне мерить ИСЯК. Омбоце ютазь чинтень мерить ИСИНДЕ ИКЕЛЕ. Колмоце чинтень ды лия а умок ютазь читненень эрзятне мерить УЛКО… УЛКОТЬ… Чинть эрзятне явтыть истя: ЗОРЯНЬ ЛАЗОМА, ПИЖЕ ВАЛСКЕ, ВАЛСКЕ, ЧИЛИСЕМАДО ИКЕЛЕ, ЧИЛИСЕМА, ЧИЛИСЕМАДО МЕЙЛЕ, ЧИНЬ СТЯМО, ЧИ КУНШКА, ЧИ ВАЛГОМА ЛАНГО, ЧИ ВАЛГОМА, СУНЬДЕРЬГАДОМА ИКЕЛЕ, СУНЬДЕРЬКСТ, ЧОПОЛКСТ, ВЕ, ТАЛАЙ ВЕ, ПЕЛЕВЕ, ВЕНЬ ПРЯДОМА ЛАНГО… Сыця чинтень эрзятне мерить ВАНДЫ… Омбоце сыця чинтень – ВАНДЫДЕ МЕЙЛЕ.. Лия сыця шкань юткотнень эрзясь лемди СЫ валонть марто: сы таргостонть, сы ковстонть, сы иестэнть, сы пингестэнть…(Поладксось карми…) Эрюш Вежай
Сыресь Боляень: Шумбра ульть, Эрюш! Пек парсте сёрмадозь. Эзинь кватя, кода ловновсь...
Эрзянь нилькс: Сыресь Боляень пишет: Пек парсте сёрмадозь. Эзинь кватя, кода ловновсь... Сюконян, Сыресь. Шка муян, прядса ды витьса-поладса...
Эрзянь нилькс: Прядозь, витезь, поладозь. Тынк мельс, эрзят. Эрюш Вежай ШКАДОНЗО... (Кода эрзятне лемдить-тешкстнить ШКАНТЬ молеманзо? ) ШКАДОНЗО Эйкакшпингстэ янксить: -Шкась а капшавтови... Сыречистэ арсить: -Мекс а лоткавтови? Тензэ мерить: - Шказо... Сон теевксэсь Пазонь, Пингтне тензэ сазорт... Истя Шкадонть арсян Ды од иес чалгсян... Эрьва мейсэ пешксесь Шкась пилесэм вешкси... ----- 2001 ие. ШКАСЬ – те Инешкипазонь арсевксэсь-теевксэсь. Секскак эрзянь кельсэнть ванстовсь кезэрень кевкстема парцунось. Эрзятне а кевстнить истя: - Зяро шкаСЬ?. Эрзятне пачк кевкстнить: - «Зяро шкаЗО?» . Сонзэ, Инешкипазонть, ШКАЗО… Шка…Шка.. Шка… Те валсонть марявить шканть молема кашторксонзо… Шаштомазо… Ювкадемазо… Сехте покш шкань ютконтень эрзятне мерить ПИНГЕ. Пингенть кувалмазо покш. Ули ловома пинге. Эйсэнзэ 100 иеть. Ули ЭРЯМО ПИНГЕ. Эрямо пингесь онксты ломаненть эли меньгак эриксэнть эрязь пингензэ. Пинге… Пинге… Пинге… Гайтев валось. Гайги налчирькень свисть сурекс-тетивакс. Пиннньк… ды кивчкадсь эрямо пингесь нолдазь налокс… Азё муик… Косо сон?... Седе вишка шка пельксэнтень эрзятне мерить ИЕ… Мазый валось… Аволь валгак. Моро… Ие… Ие… Ие… Эйсэнзэ эрить ТУНДОСЬ…. КИЗЭСЬ… СЁКСЕСЬ… ТЕЛЕСЬ… Эрьва ие пельксэнть эсензэ моронзо… Эрьванть эсензэ гайтезэ… Ютазь иентень эрзятне мерит МЕЛЯ… МЕЛЯТ… Ютась иесь… Ансяк ломаненть мельсэ сон кадовсь ды тосо эри… Мелянь тевтне зярс шождасто лецтявить, мельс пракшныть-саевить… Омбоце ютазь иентень эрзятне мерить МАНЫ… Маны, те уш аволь меля… Те седе умок… Мельсэяк аволь весе ютазденть кадовсь… Аволь весе лецтяви, мельс сы-саеви… Колмоце ютазь иентень эрзятне мерить МАНЫДЕ ИКЕЛЕ… Те иесь уш алкукс УМОНЬ… А вана кода ютыть ПИНГЕДЕ ламо иеть, сеть шкатненень эрзятне мерить КЕЗЭРЕНЬ ПИНГЕТЬ… Мазый, гайтев эрзянь валось - КЕЗЭРЕНЬ! Косто сон саевсь минек келентень? Истямо сон гайтев, теке васоло пургинень зэртьке, кона пачкодсь пилезэть ды кеверезь кевери тей-тов прясот-пилесэть: КЕЗЭРЕНЬ... КЕЗЭРЕНЬ... КЕЗЭРЕНЬ... Теке аволь валгак, цела ёвкс, конасонть маряви Эрзя раськенть ютазь эрямопингезэ. Эйсэнзэ эрить виев эрзянь цёрат-маралят, мазый эрзянь тейтерть-ават, минек пазтнэ - Инешки Паз, Пургине Паз, Кардаз Сярко... Те валось сеедьстэ сюлмави истямо валсюлмавксос: КЕЗЭРЕНЬ КОЙ, КЕЗЭРЕНЬ ШКА, КЕЗЭРЕНЬ МОРО, КЕЗЭРЕНЬ ЁВКС... Ванкшносынек валонть теема лувонзо. Койсэм КЕЗЭРЕНЬ валось эрзянь кельсэнть эри пек умонь шкатнестэ, КЕЗЭРЕНЬ шкатнестэ. Теевсь сон кавто валсто: КИЗЭ+ЭРЕНЬ. КИЗЭ валось эрзятненень чарькодеви. Теке эрзянь валось, аламодо полавтовозь, ули суоминь ды мокшонь кельтнесэ. Суоминь кельсэнть сонзэ зэмезэ-смустезэ секе - КИЗЭ. Мокшонсесэнть смустезэ полавтовсь, смустезэ - ИЕ. Мари раськень кельсэнть истяяк ули КИЗЭ валось. Зэмезэ эрзянсенть марто вейке. А вана ЭРЕНЬ валось ней истямо чачосо неень шкань эрзянь кельсэнть а вастневи. Сон теевсь ЭРЯМС валстонть. Неень шкасто минь мертяно ЭРЯНЬ, сеть тевтнеде, конат ЭРЯМОСТОНОК ютасть, тусть удалов, кадовсть удалонок, ютазь читнесэ-иетнесэ, ютазь шкасонть. Вана истя теевсь ды ванстовсь минек эрзянь кельсэнек те мазыйде мазый, теке моро, эрзянь валось - КЕЗЭРЕНЬ, рузокс - ДРЕВНИЙ. Иенть эрзятне явтыть КОВОНЬ-КОВОНЬ. Иесэнть кемкавтово КОВТ. Те ней. Койсэм, икеле эрзятне иесэнть ловсть кемколмово КОВТ. КОВ… Мазый валось… Эйсэнзэ пачк неяви сияждыця ков валдось… Иесэнть кемкавтово ковт: ЯКШАМКОВ – те ковось, зярдо эрьва чистэ – цят якшамо. ДАВОЛКОВ – учок, эрзя, ловонь даволт-бурят. ЭЙЗЮРКОВ – лато ды кудо прятнестэ чить кольги, теевить эй сюрот. ЧАДЫКОВ – лейтне кармить чадомо. ПАНЖИКОВ – виртнева, паксятнева панжтыть цецят-чувтт. АШТЕМКОВ – эрзятне зярыя шка аштить-оймсить сокамодо-видемадо мейле. МЕДЬКОВ – эрзятне таргить медь, ярсыть медьте. УМАРЬКОВ – кенерить умарьтне ды лия марьтне-эмежтне. ТАШТАМКОВ – эрзятне теить таштавкст сы телентень. ОЖОКОВ – сёксесь ожолгавты вирьтнень. СУНЬДЕРЬКОВ – читне нурькинеть, суньдерькстнэ кувакат. АЦАМКОВ – телесь сась ды ацызе моданть ашо ванькс ловсо. Ковонть эрзятне явтыть истя: КАСЫ КОВ, ПЕШКСЕ КОВ, МАШТЫ КОВ, КОВТОМО ВЕ (СОКОР ВЕ)… Лисни, явтыть ковонть ниле ТАРГОС. ТАРГОСОНТЬ – сисем ЧИТЬ: АТЯНЬЧИ, ВАСТАНЬЧИ, КУНШКАЧИ, КАЛОНЬЧИ, СЮКОНЬЧИ, ШЛЯМОЧИ, ТАРГОЧИ. Атяньчистэнть кудораськень прявтнэ-атятне макстнить тевть цёраломантненень. Вастаньчистэ сыряватне макстнить тевть аваломантненень. Куншкачись тешксты таргонть куншканзо. Калоньчистэ эрзятне сюконильть Ашо калавантень ды пидильть штюрьба. Сюконьчистэ эрзятне кундыть тоначив туезь покштятнень-сэрдятнень лемест. Шлямочистэ – шлить банясо. Таргочистэ – оймсить аламодо эрьвачинь тевтнестэ. Ютазь чинтень эрзятне мерить ИСЯК. Омбоце ютазь чинтень мерить ИСИНДЕ ИКЕЛЕ. Колмоце чинтень ды лия а умок ютазь читненень эрзятне мерить УЛКО… УЛКОТЬ… Чинть эрзятне явтыть истя: ЗОРЯНЬ ЛАЗОМА, ПИЖЕ ВАЛСКЕ, ВАЛСКЕ, ЧИЛИСЕМАДО ИКЕЛЕ, ЧИЛИСЕМА, ЧИЛИСЕМАДО МЕЙЛЕ, ЧИНЬ СТЯМО, ЧИ КУНШКА, ЧИ ВАЛГОМА ЛАНГО, ЧИ ВАЛГОМА, СУНЬДЕРЬГАДОМА ИКЕЛЕ, СУНЬДЕРЬКСТ, ЧОПОЛКСТ, ЧОКШНЕ, ВЕ, ТАЛАЙ ВЕ, ПЕЛЕВЕ, ВЕНЬ ПРЯДОМА ЛАНГО… Сыця чинтень эрзятне мерить ВАНДЫ… Омбоце сыця чинтень – ВАНДЫДЕ МЕЙЛЕ.. Лия сыця шкань юткотнень эрзясь лемди СЫ валонть марто: сы таргостонть, сы ковстонть, сы иестэнть, сы пингестэнть… Ней молиця чинтень эрзятне мерить ТЕЧИ. Лиякс меремс ТЕ ЧИСТЭНТЬ. Аволь тона, аволь се, аволь лия конаяк… Течи – те ТЕ ЧИСЬ. Ней молиця иентень эрзятне мерить ТЕДИДЕ. Лиякс меремс, ТЕ ИЕДЕ, ТЕ ИЕСТЭНТЬ. А вана течинь вентень эрзятне мерить ТЕДЕВЕДЕ. Меремс, вана истя: - «Тедеведе беряньстэ удынь. Эзинь матедевкшнэяк…» Лиякс меремс, ТЕ ВЕДЕ, ТЕ ВЕСТЭНТЬ. Весемеде нурька шка юткотненень-пелькстнэнень эрзятне мерить истя: НЕЙ… Ней, те ней, сестэ, зярдо ломанесь НЕИ теезенть, теевицянть, теевкшныцянть, сень, мезезь неяви сельмсэ. Те валстонть теевсь НЕЙКЕ валось, конань зэмезэ истямо: шкань апак сацтне, апак таргсе, апак ёмавтне. Лиякс меремс – СЕСК, эли СЕСКЕ. Неть валтнэяк онкстыть шканть. Невтить сонзэ нурька ютконзо. Сехте нурька шкань юткотненень эрзятне мерить СЕЛЬМЕ КОНЧТАВКСОКС эли СЕЛЬГЕНЬ ПРАМОКС. Неть шка юткотне ЮВК ютыть, мельгаст а кенерят… Зярдо эрзясь важодсь валскестэ саезь чокшнес, сестэ мерить ЧОП. Лиякс – чопотемас, чоподань прамос, ЧИНЬ ПЕРТЬ. Вестэ тевтнеде мерить ВЕНЬ ПЕРТЬ: - «Веньберть ютась виев пиземе…», - «Вень перть увсо пувась виев варма…» Истяня эрзятне ловокшность-тешкстнесть ШКАНЗО молеманть, зярдо эрзятнень арасельть ды сынь эзть сода шканевтимть (часы). Вансть чипаенть лангс, ковонть лангс, вансть перть пельга ды эсест ладсо-койсэ, эрзякс тешкстнесть ШКАНТЬ молеманзо. Рузонь келенть трокст совасть эрзянь кельс шкаютконь од лемтне: ЧАС, МИНУТА, СЕКУНДА. Неть валтнэ аволь рузонь. Рузонь кельс сыньгак совасть лия кельстэ. А вана кода сынст лемдяма эрзякс? Теевить-арась неть валтнэ эрзянь келенть вельде? Улема, часонтень эрзякс меремс аволь "час", меремс "ШКАКС"? Минутантень меремс "МЕНЬЮТКО" (мени+ютко)? Секундантень меремс "СЕСКЮТКО" (сеск+ютко)? Эли лиякс кода? Эли кадомс келезэнек сазь валтнэнь? Кие соды? Кияк… ШКАЗО невтьсы…
Эрзянь нилькс: КАВТОЛДОМАТ - Эрян? Эли ансяк - улян?- Кевкстнян эсь прям, кевкстнян... - Моран? Эли ансяк ранган?- Арсян теде... Арсян... - Ломанть ветян? Мельгаст молян? - Пивтян... Тей-тов эвтян... - Неян? Эли ансяк - ванан?- Аздан теде... Аздан... Чопода весэнть а удан. Арсян... Майсян... Кувсян... - Чарькодян мезеяк? -Вечкан?- Аздан теде... Аздан! Менельстэнть палозь теште прась, Удомам зярс арась, арась... ------ Эрюш Вежай
Эрзянь нилькс: ЭРЗЯТНЕНЬ МАРТО КОРТАМО Минь - эрзят! Кодаткак аволь "мордват"! Содадо, вечкевикс эрзят! Сюпав ютазенек - кекшизь, Кезэрень леменек - нельгизь, Коенек - яжасть ды коласть, Секс - кенярксчить эрзянь арасть... Эрзянь кеме ойменек синдсть, Ды истя ютасть сисем пингть... Згилямо вал тенек педявтсть, Эйсэнзэ минек визделгавтсть, Ды те удалась тенст... Монень мерить: - Иля лавга! - Ялгаксчинть - иля кола! - "Мордва" валсонть ули покш смусть!- Мик каштанчи эйсэнзэ мусть... Мезе меремс тень лангс, оят? Улить ютксонок чоподат. Сынь киска ладсо пачк эрить, Ки анды - сень лангс а онгить... Ды кода онгомо кармат? Азортнэ сеск нельгсызь будкат... Ансяк, эрямонок невти, Мезесь ули - се видечи: Ульнесть Рузмасторсонть "чухнат", Ульнесть "чуркат", "хохолт", "бульбат"... Ды седе тов.... Ютксост миньгак, эрзят-"мордват"... Истя ульнесь, истя, оят... Варштадоя... Косот ней сынь? Кода лемест? Косо ней минь? Сынь ёртызь, каизь травамкаст! Арсек, эрзя... Арсек ды каст... Ванок. Арась "Чухляндия", Ули Эстония. Ули Украина, Арась "Хохляндия"... Ды "Чуркестан" арась... Арась "Бульбондия"... Кадовсь ансяк вейкесь, Кадовсь "Мордовия".... Эрюш Вежай
Эрзянь нилькс: Эрьва (превей) эрзянь ломанесь эрямопингензэ перть эри колмо важов шка юткот: 1. Превии ды эстензэ ташты. 2. Виеми ды малавиксэнзэ туртов лезды. 3. Оймии ды чарькодьсы эсь раськензэ питнензэ-сюпавчинзэ ды, мезе виезэ ули, лезды эсь раськенстэнзэ. (Эрюш Вежай)
Танюш:
Эрзянь нилькс: Сюконян, Танюш! Мезень кис ? Валтнэнь кис, эли од сёрмадовксом кис шнамот?
Танюш: И валтнэнь кис, и од сёрмадовксонть кис)))
Эрзянь нилькс: Танюш пишет: И валтнэнь кис, и од сёрмадовксонть кис))) Сюконян паро валот кис.
Эрзянь нилькс: Вармань тошкавкс.... Ней тонь кувать а нетян, Васов, васов туить, Мелезэть мон а летян, Оймить... Стувтыть... Кельмить... Кадовсть валдо лецтнемат, Сынь тонолнэкс липнить, Сынь ней эйсэм а пицить, Ансяк оймем эждить... Палыця теште пракшнось, Летьке тикшень росас, Варминесь тошказь кевкстнесь: - Ки сась? - Ки сась? - Ки сась?... Эрюш Вежай 2010 ие, сундерьков. Петра ошсо.
vijan: пек вадрясто теезь тев, седе пек меельце валтнэнь гайгемась)))
Эрзянь нилькс: vijan пишет: пек вадрясто теезь тев, седе пек меельце валтнэнь гайгемась))) Сюконян, Виян. Монсь те валморыненть кис эстень путынь 3.
Эрзянь нилькс: Одирьва ды нардамо. (Сёрмадызе Эрюш Вежай, Наста аванзо ёвтнеманзо корява.) Алтави Аваломанень чинтень эрзянь аватненень. Вейке кезэрень ды мазый эрзянь велесэ эрясь-аштесь седикеле вейке кудораське. Веленть лемезэ ульнесь Вадов веле. Покшоль велесь. Куринкатнедеяк ламолть эйсэнзэ. Сехте покшось ульнесь Одкуринка, лиятне – Алопе, Верепе, Эрькелей, Кутор, Пенза, Колка, мик Кенерьпакарьгак ульнесь нурька куринкине, кона явиль Пенза куринкастонть трокст ве ёнов. Васов таргавкшнось Вадов велесь Карголеенть кувалт. Покшоль се эрзянь кудораськесь. Сюпаволь. Мезест ансяк арасель кардайсэст-пиресэст. Алашат, скалт, реветь, тувот, дигат, саразт, мекшть, мик куркасткак лиясто ульнесть-эрсесть. Кудазоронть лемезэль – Ишут, кудазораванть – Нуякша. Сынст ульнесть кавто цёраст – Сэрьге ды Кията, ды колмо тейтерест Вияна, Лияна ды Литова. Покш цёраст, Сэрьге, урьвакстозель, уш сонсь видиль-сокиль, низэ тензэ кавто эйкакшкеть чачтась. Сась шка мирденень максомс покш тейтеренть, Виянань. Тейтересь мазыель, кеме рунголь, теке марто ёлганяль, теке чова селейне, ванькс ашо чамаль. Сельмензэ – теке сэнь домка эрькть валдосо цивтёрдылть. Варшты лангозот – паро ёжосо казтянзат. Варштат лангозонзо, сельметькак мазычистэнзэ теть мекев а саевить. Вадряль тейтересь, весемесэ, кода мерить, сайсь. Чамасояк, рунгосояк, валдо превсэяк, чевте седейсэяк, ёроков кедьсэяк. Истятнэде эрзятне пачк мерильть: аволь тейтерь - Инешкипазонь казне. Лия эйкакштнэяк весе ульнесть пек вадрят, ансяк Вияна ютксост ульнесь парочисэнзэ сехте сельмс каявиксэкс-неявиксэкс. Вечкилизь сонзэ тетязо-авазояк, лелязо-ялаксозояк, сазорнэнзэяк. Ансяк сась шка, ды састь покшкудат чиямонзо. Авардезевсть тетятне-аватне, талнозевсть лелятне-ялакстнэ ды сазорнэтне, ды тейнемс а мезть. Кенерьсь Вияна тейтернесь. Теевсь мацеень кондямо мазый тейтерекс. Сась шказо мирдене лисемс. Кода эрзятне мерить, кенерезь умаренть чувсто эряви шкастонзо кедьс саемс, лиякс сон сонсь пры. Истяня арсесть-тейсть тетят-ават ды алтызь Вияна тейтерест, седей пельксэст. Чиямо чись ютась вадрясто. Ломо инжеть сакшность од содамонть ды одирьванть пельде. Максызь паро кудораськес. Атявтонь-ававтонь кудораськеськак покшоль. Сюпаволь. Важодемань вечкицяль. Ютась пель ие. Сась Вияна эсь тетянстэнзэ-аванстэнэ инжекс, тиринь кудов. Авазо кевкстни: - Кода, сырнень покольнем, эрят од кудосо? Стака теть, аволь? Тона мери: - Аволь стака, авакай. Аволь стака, тирякай. Мирдем вечксамам. Ававтом мелем ваны. Атявтом а покори. Весе вечксамизь. Весе кольневтить эйсэм. Стака тевс а аравтыть, муськемасо а сизевтнить. Эрямом пек паро. Ансяк вейкесь аволь паро. Валске стян, шлян, нардтнеме карман – нардамось пачк летьке, пачк начко… Ды истя эрьва чи… Мекс истя, а содан… Мезть тейнемс, а содан… (Кезэрень шкатнестэ шлямо таркасо пачк ульнекшнесь понгавтозь ансяк вейке покш, коцтонь, нардамо.) Укстась авазо, таргизе оймензэ, ды мерьсь: - Тон, левкскем, стякшнок весемеде икеле, сестэ нардамось пачк коське карми… Истя тейтересь тейськак. Топавтызе аванзо превспутоманзо ды кармась эрямо седеяк уцяскавсто. Чачтась вете эйкакшт, кастынзэ-тринзе ды кулось ве чистэ вечкевикс мирдензэ марто. --- ---- ---- 2011 ие, эйзюрков, 1 чи
полная версия страницы