Форум » Сёрмадоматев/Литература » Ашо повне » Ответить
Ашо повне
Purgine: Ашо повне Ёвтнема Людмила Рябова Окойники менинь. Менинь пулев оштонть, лепиявтыця псиденть, ледстнематнеде. Мерят понгинь лия планетас: моры морясь, вальмантень венстизь тарадост кодат-бути од, асодавикс чувтт, ды, мезесь сехте паро, – пряпесэнь арась телефон. Зяро мелеть васькак ашо вельтямонть ало. Кияк эйсэть а учи, а капшавты. Ансяк… Ансяк зярс истя карми? Ков, кавто, паряк, ие? А мейле? Мезе теемс мейле? Велявтомс кудов?.. Кудом арась. Зярдояк эзинь арсе: кадован ськамон, манясамам, ёртсамам, прок аэрявикс ташто налкшке, сехте малавикс ломанем. Кода сатотсь виезэ эрямс мартон апак вечке? Певтеме кеминь тензэ. Сон жо, прок покш шанжав, кодась удалон манчемань коцтонзо. Кадымим кудовтомо, тевтеме, вечкемавтомо… Саты! Весемесь стувтови, зярдояк ды стувтови. Эряви стувтомс. Лекстян зярскак ды ушодан од эрямо. Ансяк ушодови а ушодови те од эрямось?.. Саты кольнемс. Стяма. Каткакс кирнявтынь чевте ацамотнень потсто ды чиинь вальмантень. Икелень панжовсь певтеме сэнь менель, кона косо-бути васолдояк васоло васодсь истямо жо сэнь моря марто. Велькссэнзэ, прок ашо толгине, – чайка. Сонгак ськамонзо… Арась, вана ваксозонзо ливтясь омбоце, колмоце. Паряк, те нармунень семия? Тетя, ава ды эйкакшке. Ансяк а содан, эрить а эрить чайкатне семиясо, содасызь-арась тетяст вишка нармушкатне. Карми зярдояк моньгак алкуксонь семиям? Муеви а муеви ломань, кона кармавтсы седеенть стувтомс весе беряненть, кона тонавтсамам одс эрямо ды вечкеме?.. Кенкшентень вачкодемась сезинзе арсеман. Совась бабам – вейкине ломанесь, конанень нейгак певтеме кеман. Сон зярдояк а манясамам, а кадсамам. Зяро вий тензэ эрявсь монь кастомс тетянь-авань куломадо мейле! Эрявольтькак сынь, паряк, лия улевель уцяскам… Бабанень пек стакаль. Лездасть тетянь ялганзо. Стявтымизь пильге лангс. Прядынь паро университет, панжия эсь тевем. Ды на теть, весементь ёмавтыя! Монсь казия мирденень, кона текень учоськак. Косо ней сон? Паряк, монь ладсо кунсолы морянть? Монь ладсо? Арась, мон ськамон, сон – аволь… Бабам токизе лавтовом, тердимим алов ярсамо. Пси кофе, ашо калацят, сыр, столенть куншкасо суликань покш кедьгесэ эрьва кодат фруктат. Кода кирдеви тензэ истя ваньксстэ те покш кудось? Зяроксть муиксэлинь лездыця, сон – каршо. Бабам монь ладсо вечксы ськамочинть ды сэтьменть. Те кудось вансты минек семиянть весе пингензэ: тесэ эрясть тетянзо-аванзо, покштянзо-бабанзо. Нама, шкась кады тешксэнзэ, ламонть эряволь витнемс, ды бабам яла а мери. Вишкинестэ ульнесь мелем панжомс морянть чирес оймсема кудо, пертьпельксэсь улезэ пешксе эрьва кодамо ломанде, эйкакшто. Мейле туинь тонавтнеме ды полавтынь мелень. Муинь эстень вечкевикс тев, панжинь клиника, венчинь… Моря чиресэ те таркинесь жо кадовсь мелезэнь эйкакшонь онокс. Тезэнь сылинь сехте стака читнестэ, ды бабам свал муиль валт, конат лекстильть эйзэнь кемема ды вий. Бабам ды морясь… Сынь кавонест лездыть монень эрямс. Вакссост марян прям кемекс-кемекс – киненьгак а синдеван. Ярсамодо мейле саинь покш нардамо ды, кевтнень ланга кирнявтнезь, валгинь алов, косо цитнесь ашо чуварось ды налксесь пижела-сэнь толкуннэсэ морясь. Вечкса те тарканть! Чаво, сэтьме, маласо эрицят арасть, кияк а коласы ськамочим. Кудонок эйстэ зярыя вайгельбень тарка эрясь лия семия, ансяк мон киньгак эйстэст эзинь вастне. А содан мекс, зярдо монень ульнесть кемгавтово иеть, сынь кадызь кудост ды тусть неть таркатнестэ… Паряк, састь од эрицят? Ванды варштан тов. Ней жо… Шумбрат, вечкевикс морям! Кода тошнаинь кисэть! Тонгак? Ведесь чевтьстэ нолштынзе пильгень, палызе пекем, мештем, кедень… Прынь кутьмерем лангс ды овсе вельксстэнь таго неинь чайка. Шумбрат, оинем! Кода теветь?.. Пси чинть ало васькамодо мейле састынька сыргинь кудов. Ды… валаня чуваронть лангсто рединь пильге тешкст. Паряк, кияк бабанень сакшнось? Сыргинь седе эрязасто. Бабам котьмась виноградонзо вакссо, пурнась кенерезь цюцькатнень. Ёвтния, мезе неинь. Мерсь, паряк, кияк оймсеме ардыцятнестэ валгонесь морянтень, ансяк сон кодаткак машинат эзь редя. Паряк, од шабранок улить?.. Валске марто, ансяк кенерсь стямо чись, сыргинь васоло кудонтень варштамо. Вадря молемс морянть чирева. Зярс экше. Чись эзь кенере пурнамо вий, эжди, а пици. Чилисема ёндо пуви шожда вармине, сормсевти морянть валдо-сэнь чаманзо. Вана уш неяви кудонть латозо, перьканзо касыця рацяня чувттнэ. Зярдо пачкодинь ашо кевень пирявтонть ваксс, чарькодинь: тесэ эрицят арасть. Пирявксось тия-тува лондадсь, кшнинь кенкшесь чемениясь, вальматне вансть лангозон чаво, нусманя сельмсэ. Мон токия пире кенкшенть, тона чикордозь панжовсь. Сеске косто-бути кудонть удалдо каятотсь кискань онгома. Косто тесэ кискась? Оймсицятнеде кадовсь? Мекс-бути прязон эзь вельме кевкстема: кежей аволь те кискась? Эзинь пеле, сусксамам. Потсон вельмесь эйкакш, кона бажась муемс оя. Ютынь пужозь цецятнень юткова ды лисинь удалце кенкшентень. Онгомась эзь маряво. Састо айгинь пиже куракшонть тарадонзо ды… талакадынь. Эйстэнь кавтошка эскельксэнь туро аштесь пеель марто цёра, панартомо, ансяк понкссо. Сельмень апак сае зярсыя ванынь лангозонзо, мейле эрязасто велявтынь ды ношкстынь кенкшентень. Прясон чавсь вейке арсема: те кодамояк апаро ломань кекшни тесэ. Череньгак стясть. Седеяк талакадынь, зярдо неия кенкшенть икеле мадезь покш тюжа кисканть. Кись керязь. Мон ёртовинь лия пелев, арсинь муемс пирявтстонть лисема варя ды эртевинь кискань азоронтень. Сон кеместэ сювордынзе кедень ды сорновтымим истя, мик череньгак менсть, кекшизь-копачизь чамам. – Оймак, иля пеле, – каятотсть пилезэнь чевте валонзо, – мон мезеяк берянь теть а теян. – Истя кортыть весе чавныцятне, – кижныця вайгельсэ меринь мон. Цёрась гайтевстэ раказевсь. – Мон аволь чавныця. Мон эсень кудосан. А вана тон кие, пароль бу содамс. Паряк, салыця? – Мон?! – кежтнеде превеньгак чаракадсть. Ноцковтынь кедень, ансяк эзть менстеве. – Саты, саты. Кеман, аволь саламо сакшныть, – таго пейдезевсь сон. – Сестэ ульть инжекс, адя столенек экшс, каванятадызь сывельде. – Рекс, – пшкадсь сон кискантень, – сави максомс тонь пельксэнть апак терде инжентень. Кискась аволдась пулосонзо ды сыргась мельганок. Пейдькшни: макссы кисканть сывелензэ, апак терде инжекс лемдимим, салыцякс. Кикс лови эсь прянзо?!. Кодаяк менемс тестэ. Сон озавтымим та-кодамо мукорь лангс, Рекс мадсь пильгень ваксс – ванстомон. Да-а, виде-паро тюрьма. Мезекс сынь тей, эзинь аштеве кудосо? Азорось те шкане витсь толбандя, анокстызе сывеленть. Зярдо пенгтне палсть, ушодсь рестамонзо. Коштось пешкедсь тантей чинеде. Мон туинь апак ярса, секс салава нильнинь сельгть ды ванынь мельганзо: раужо черензэ наразь нурькинестэ, чопода-пиже сельме, чова, виде судо, кедензэ виевть, рунгозо кеме, киськезэ валаня, валдо-тюжа. Сеске сайтянзат мель вадяшамс. Мезде мон? Эзь сатно ансяк невтемс эсь мельтнень. Сельмень састо нолажтсть мазый рунгованзо ды эртевсть каршо вановтс. Таго пейди. Чамам кирвазсь, эзинь кирдеве, нолштынь коське турван. Марявсь, те чопода-пиже пшти вановтось совась чова панаром пачк овсе седеезэнь ды кунсолось тосо весе арсематнень ды мельтнень. Нолдынь сельмень ды коминь кискантень, вадяшия цитниця чевте понанзо. Эряви оймавтомс чавиця седеенть. Мекс монь истя уски-тарги те асодавикс ломанентень? Сон пейди лангсон, кирди тесэ вийсэ. Ансяк ули-арась мелем туемс ваксстонзо? Эйстэнзэ моли кодамо-бути лембе, сэтьме. Аштевлинь ды аштевлинь маласонзо… – Сывелесь анок, – сезинзе арсеман ней уш содавикс вайгелесь. – Соватано кудос эли теске каванямс покш инженть? – Седе паро теске. – Видеяк. Мон ансяк исяк сынь ды зярс эзинь кенере урядамо вейкеяк нупаль. Ламо иеть ютасть. Мон арсинь, те кудось уш араськак. Сон аламос чатьмонсь, мейле кенярдозь поладсь: – А карматано нусманядо. Ярсамодо икеле эряви теевемс содавиксэкс. Мон Даниил, – венстизе кедензэ. – Валерия, Лера, – меринь мон, ды кедем ваясь калгодо покш коморозонзо. «Да-а, аволь аламо пуворькстнэде! Нать, аволь истямо шождаль эрямот, кода маряви лангс ванозь». – Покш мельспаросан, Лера, сень коряс, истямо мазый инже сась Рекс марто содавтомонок. Сюкпря. Инеськеть, ютадо столенек экшс. Сон сыргась пельспужозь цецятнень юткова виноградсо кодазь латонть ало а покш стольненть пелев. Мейле аламос кадымизь Рекс марто кавоненек. Велявтсь коньяк сулика марто. – Простямизь, ведте башка седе лавшо мезеяк арась. Мельсэнь ашти, кода тантейстэ качадсь рестазь сывелесь, кода псистэ тусь рунгован коньяконь васенце рюмкась, ледстяви мик кенерезь виноградонь ламбамо танстесь ды тештев менеленть ало морясо экшелямось. Мейле – ансяк чопода. Мон кепедия лазыця прям ды вайкставинь сэредькстэнть. Пряпотсон теке баягат чавсть. Мезе теинь исяк? Варштынь перькан: удан ташто дивансо, киякссонть мезе ансяк арась. Вана косо визьксэсь, истянь симемс! Мон капшазь оршинь ды салава панжия кенкшенть. Кудонть удалдо марявсь гайтев вешкема – кодамо-бути моронь лув. Сонзэ, улема, прязо а сэреди. Зярс эзимим маря Рекс, лисинь пирявкс кенкшканть ды ношкстынь кудов. Те шкас бабань превензэяк маштсть кисэнь ризнэзь. Пилесэнь вешксь вармась, чись пидесь прянть. Окойники пачкодинь кудонок малас. Эзинь кирдеве, валгинь морянтень ды ёртовинь экше сэняжантень. Зярдо совинь кудос, бабам сыргиль вешнемень. Васенцеде тень ульнесь алкукс визькс те сыре ломаненть икеле. Сон эзь сёвно, эзь кевкстне, сон чатьмонезь учось, ёвтан а ёвтан мезеяк тензэ. Эзинь ёвта. Меринь ансяк, кие илязо са, мон тесэ арасян, сон монь а содасамам ды зярдояк мондень эзь марсе. Бабам кунсолымим. Зярдо зярыя шкань ютазь каятотсь Рексэнь онгомазо ды содавикс вайгелесь кевкстсь, тесэ-аволь эри Лера, бабам ансяк чаравтсь прясонзо ды онкстниця вановтсо вансь цёранть сэрьга. Мон лекшкадынь кенкшенть удалов ды учинь, мезе ули седе тов. Рекс, улема, маризе чинем ды макссь теде содамс гайтев онгомасо ды кенкшентень коцькерямосо. – Инеськеть, мереде тензэ, кадык сы. Монень пек эряви кортнемс мартонзо, – мерсь Даниил. Бабам чатьмонсь. Сон зярдояк эзь вечке манчеме. Ютасть колмо таргот. Мон эзинь яка тов, козонь, улема, кадыя оймем пельксэнзэ. А ёвтави, зярошкаль мелем стувтомс визьксэнть ды каштанчинть, шожда ялтокс ливтямс тов, косо эрясь ломанесь, кона ве чис теевсь тень истямо малавиксэкс. Анеявикс вий усксь эйсэнь. Стакаль видькстамс, учинь эйсэнзэ эрьва чи. Ансяк сон эзь са. Мекс? Паряк, стувтымим?.. Течи фатинь, ярмактне, конат кадовсть мирдень марто явомадо мейле, малав маштсть. Шка вешнемс кодамояк тев. Зярс бабань экшсэ аштемс? Валске марто сыргинь ошов. Паряк, муян кодамояк клиника эли аптека, косо эряви важодиця. Кувать аштинь ки чиресэ, учинь автобус эли ютыця машина. Окойники васолдо рединь якстере иномарка. Истятнэ чуросто озавтнить пассажирт. Ялатеке аволдынь кедьсэ. А кемеви, лоткась. Руленть экшсэ озадоль артозь чама од ава. Ашо тусто черензэ нурьгсть штапо лавтовганзо ды кутьмерензэ кувалт. Кинь перть таргась ды ёвтнесь эрямодонзо. Мон зярдояк эзинь вечке кортамо эсь мелявкстон асодавикс ломань марто, секс эзинь кунсоло певтеме валонзо. Эсень мелявкстнэяк сатыть. Ансяк зярдо пилезэнь каятотсь содавикс лемесь, мерят ёжос сынь. Сон ёвтнесь седе, кода кадызе мирдезэ, зярдо неизе лия цёра марто. Тона ульнесь тензэ ансяк оякс. Ды Даниил эзь кеме, тусь эрямо ташто кудозонзо. Сон вечки романтика: моря, чаво таркат, Рексэнзэ марто чийнемат-налксемат. Паряк, кодамояк превтеме русалка понги. Сон истямо, вакска а нолдасы. Кунсолынь ды мерят симинь рудазов ведте, кона пештизе потмон ды сезсь седеем. Превтеме русалка? Романтика? Рекс… Даниил… Нама, кортамось монь од содавикстэнть. Ули низэ… Велявтсь-арась тензэ? Авась мерят маризе кевкстемам, мизолдозь мерсь: – Содатадо, минек карми эйкакшонок. Кеман, ули цёра. Даниил свал вешсь пельдень цёрыне. Эйкакшонть кисэ сон весементь стувтсы. Арсинь, а саты тень лексемс кошт. Кодаяк эзь учово, зярдо пачкодтяно ошонтень. Машинасто лисемстэ сельмень сявадозь варштынь каршон пейдиця аванть лангс. Таго аволь монь уцяскась. Эрязасто велявтынь ды сыргинь маласо аптекантень. Тосо важодиця уш аволь од авась максынзе тень ошонь больницятнень адресэст. Цела чи якинь, таркат косояк арасельть. Вейкесэнть вешнесть шлиця. Эзинь карма. Монень эрявсь кундамс вечкема тевезэнь, стувтомс весе беряненть, чопавтемс се коштонтень, косо маринь эсь прям кода ведьсэ кал. Окойники меельце таркасонть, козонь совинь, муевсь тень тев. Се, мезе эрявсь. Терапевтэнь дипломось ды зярыя иень перть важодемась лездасть. Пандомс алтасть байтяк. Бабань марто кавозонок сатыть. Кудов велявтынь чокшнень автобуссонть. Куш вейке паро куля: карми тевем. Паряк, кадсамизь нусманя мельтне-арсематне. Тееван содавиксэкс од ломань марто, монськак полавтован. Шка мадемс. Ванды рана стяма. Паряк, муемс ошсто квартира? Бабам таго ськамонзо кадови… Сиземась сезинзе арсеман. Матедевинь. Эзь маряво, кода ютасть васенце тарготне. Важодема таркам мелезэнь тусь, муинь од оят. Ансяк эрьва валске ки чиресэ аштемстэ ледстилия ашо черь аванть мизолдыця чаманзо ды чопода-пиже, пачкат ютыця сельмтнень. Косот ней сынь? Вейсэть-аволь?.. Течи ошов ардомсто пек беряньстэ мария прям. Савсь мик лоткавтомс автобусонть, лисемс ванькс коштто лекстямо. Чинь перть майсинь. Тувталонть содызе важодиця ялгам. Модаськак пильгень алдо тусь: карми эйкакшом. Верепаз, косто?! Мирдем ие мартон эзь эря. Ды тесэ превезэнь истямо сась! Арсематне мекшекс велясть прясон. Кода ёвтамс бабанень? Мекс ней, зярдо эрямом аламонь-аламонь совась лувозонзо? Кудов сынь теке ведьс навазь. Мезеяк перькан эзинь редя. Бабам сеске фатясь ёжозон. Кевкстнеме эзь карма, учось. Ярсамодо мейле ёвтыя тензэ «кенярдовтыця» кулянть. Учинь кевкстема: кинь пельде? Эзимим кевксте, ансяк мерсь: «Кадык ули истя, кода ули. Кастасынек». Вензэ перть валсь пиземе. Ёндолонь ожо пеельтне пельксэнь-пелькс керсесть менелень чоподанть. Удынь беряньстэ, неинь кодат-бути ачарькодевикс онт, ламоксть сыргозекшнинь. Валскесь вастымим чова пиземесэ ды якшамо вармасо. Паро, течи оймсема чим, ковгак а молема. Тапардынь лембе велькссэ ды кирневинь вальма вакссо чевте креслантень. Бабам кандсь лимон марто пси чай. А васоло неявсь морясь. Свал истямо малавикс, ней сон марявсь кельмекс ды кежейкс. Панжия вальманть. Экше коштось эшкевсь чамазон. Бабам мезе-бути котьмась чувтынензэ ютксо. Оршинь седе лембестэ ды лисинь ваксозонзо. Важодемстэ шкась а маряви. Курок чикуншка. Апак учо удалонок каятотсь кискань онгома. Мон мик ёртовинь. Мелезэнь сеске ледсь Рекс. Мон пелинь велявтомс ды неемс сонзэ, пелинь марямс вайгелензэ, пелинь сыргозтемс сеть мельтнень, конатнень истя бажинь стувтомс. Кода аштинь пульзядо кептеренть вакссо, истя кадовиньгак. Бабам сыргась сыцянть пелев, мезе-бути кевкстсь. Марявсь, кода панжовсь ды пекставсь кудо кенкшесь. Сестэ ансяк шождасто лекстинь: те кияк оймсицятнестэ, мезеяк эряви тенст. Велявтынь ды ваинь чопода-пиже моряс… Зярдо сынь ёжос, вельксэзэнь комасть кавонест: бабам ды сон. Рекс лембе кельсэнзэ нолсесь кедем. Даниил мезеяк эзь корта, ансяк вансь, вансь видьстэ сельмезэнь, мерят бажась ловномс арсеман. Бабам тердизе Рексэнь ды лиссь. Мон ванынь вакссон аштиця цёранть лангс ды апак учо чарькодинь: мон овсе а содаса те ломаненть. Кие сон? Косто сась? Кода совась эрямозон? Мекс вастыя ды кодаяк а стувтса? Сон таргась зепстэнзэ заколка ды венстизе монень: – Те тонь, стувтык саемс. – Эзь эряво истя мелявтомс, сон аволь питней, – мекс-бути покордавозь вайгельсэ меринь мон. – А содан, кода весе толковамс теть. Бути чуман икелеть, простямак. Тон казить монень алкуксонь уцяска, меельце шкасто эринь ансяк тондеть ледстнематнесэ. Бути те аволь вечкема, сестэ мезе? Косо аволинь уле, кинь марто аволинь корта, мельсэнь свал вайгелеть, мизолксот. Тонь марто эрямом пешкедсь од кенярксто ды валдодо. Мон аштинь сельмень конязь ды весе вийсэ кирдинь сельведтнень. Кие содаволь, кода бажинь марямс неть валтнэнь! – Мон а карман ламо кортамо, – таго каятотсь чевте вайгелезэ. – Вейке мелем: свал улезат вакссон. – Свал? – кевкстинь мон. – Свал. – А нить ков тейсынек? – валтнэ сынсь ливтясть кельпрястон, мон овсе аволь тень бажинь ёвтамс. – Тон арсить, мон мезеяк а содан, а содан нидеть, эйкакштот, конань учи сон. Вечкат романтика? Муить превтеме русалка? Мон мейсэяк а чумондан эйсэть, монсь теия ильведьксэнть, монсь витьсаяк. А эряви манчемс, стяко ёмавтнемс валт. Тон мейсэяк а чумат, ансяк кадомак, стувтомак монь! Мон зярдояк а карман омбоцекс, зярдояк а колан лиянь семия. Монень се чокшнесь марявсь ансяк налксемакс! Монгак вечкан романтика! Сельведень чудсть чамаван. Мон мезеяк эзинь маря ды эзинь нее, ансяк пижнинь ды энялдынь кадомс монь. Низэ учи пельдензэ эйкакш, а сон сась монень ды корты вечкемадо! Истя маштыть ансяк цёратне! Зярдо окойники маштсть валон ды мон панжинь сельмень, вакссон аштесь ансяк бабам. Сон чевтьстэ вадяшась черень ды яла оймавтсь эйсэнь. – А косо… – ушодынь мон. – Тусь. Иля мелявто, сон зярдояк а сы. Зярдояк а сы… Бабай-бабай, содавлитькак, кода учинь сонзэ самонть. Читне усковсть истя састо, мерят весе менеленть сталмозо прась лангозост. Те шкас а содан, видестэ-аволь теинь сестэ. Учинь уцяска, ды зярдо тона сонсь вачкодсь вальмазон, пания. Монь семиям колызь. Мекс монень стака теемс истя жо?.. Арась, кадык улян ськамон, ансяк эрямонь перть а марямс чумочи лия ава ды эйкакш икеле. Киненьгак а арсян ютамс манчемань ды ськамочинь сэредьксэнть пачк. Тень лангс апак вано, эрьва чи учинь марямс Рексэнь онгоманзо ды вечкевикс вайгеленть. Арась, эзь са. Чачтынь цёра, истямо жо чопода-пиже сельме. Лемдия тетянь лемсэ – Андрей. Ванынь лангозонзо ды янксинь, мекс эзинь сельге весементь лангс ды эзия кирде вечкевикс ломанем. Седеяк пштилгавтызе янксеманть вейке вастовомась. Мартон ве палатасо аштесь низэ – Вера. Мондень кавто чиде икеле сон чачтась тейтерька. Зярдо неия, превеньгак чаракадсть. Сон, нама, эзимим ледстя ды сеске ушодсь кенярдозь чоледеме. Кунсолынь – вал эзинь менстя. Ды мария сехте эрявиксэнть: ванды сы мирдезэ ды сайсы кудов. Уцяскав ава… Зярдо палатантень совась цеця пусмо марто цёра, ловнылинь. Вера, цёковокс чоледезь, поводевсь кирьгазонзо. Ветизе малазон ды мерсь: «Уледе содавиксэкс, те монь мирдем, Володя. А те Лера. Арсян, таго зярдояк вастовтано. Чао!» Мон кургонь автезь ванынь мельгаст ды эзинь кеме эсь сельмезэнь. Володя? Мекс Володя? Кевкстеман прок маринзе шабра авась. Чаравтызе прянзо ды пейдезь мерсь: – Уцяскав тетяськак муевсь. – Муевсь? – эзинь чарькоде мон. – Тонеть эзь кенере ёвтнеме? Мирдезэ явсь мартонзо, эйкакшось аволь сонзэ, тень вана. – А мирдезэ ней косо? – кевкстия мон. – Кие соды… Мон аштинь ды поринь турван. Истяяк эрси. Пелинь коламс анок колазь семия. Таго сась кизэсь. Цёрынем сэтьместэ удось экше таркинесэ. Бабам котьмась вакссонзо, витнесь тодовтнень-ацамотнень. Нуцьказо казсь тензэ од вийть, од кеняркст. Зярс эйкакшось удось, сыргинь экшелямо. Умок эзия содавтне морянть, эзинь чопавтне менелень тюссо ведезэнзэ, яла аютколь. Морясь вастымим лембестэ, шлинзе апаро мелень, стака арсеман. Чуваронть лангсо аламос аштемадо мейле саинь мель ютамс ашназа-ожо берёкканть. Пильгень сынсь ветимизь содавикс пирявксонтень. Содавикс ды асодавикс. Чеменев кенкшесь артозь, каладозь таркатне витнезь, чувттнэ мазыйстэ наразь, цецят, виноград… Омбоце этажсо вальмась панжадо, ашо шаршавненть эрьва ёнов ускси вармась. Седеем таго ушодызе талномань моронзо. А бути аволь сон? Паряк, тесэ од эрицят? Паряк, миизе кудонть? А бути сон, сестэ мезе?.. Аламос кавтолдомадо мейле панжия пире кенкшенть ды ютынь цеця пандинетнень юткова. Костояк эзть маряво вайгельть, арасель меньгак шалт. «Мезе мон тесэ теян? Кинь вешнян? Ёмавтозенть а мусак. Монсь кочкия те кинть. Шка уш стувтомс весе лисезенть. Паряк, сонгак стувтызе. Мон жо сан ды… коласа эрямонь сэтьмечинзэ... Кие соды, паряк, од семиязо ули…» Мон молинь ашо цецятнень юткова таргавозь яннэванть ды ванынь вальматнень лангс. Арась, кияк эзь варшта, эзимим серьгеде, эзимим кирде. Меельцеде велявтынь кудонть пелев, козонь кадовсь седеем, ды састо пекстыя мельган кенкшенть. «Кадык ули истя, кода ули», – ледстинь бабань валонзо. Мон валгинь морянтень ды сыргинь ведьсэ нолсезь чуваронть ланга. Лембе толкунтнэ палсесть пильгень. Веденть велькссэ чайкась неявсь ашо повнекс, конасо чочазельть вейс сэнь менелесь ды морясь. Мон ванынь мельганзо, зярс сон эзь ёма сельмень икельде. Ды ансяк сестэ варштавинь частнэнь лангс: шка андомс эйкакшонть. Нама, бабам весементь тейсы кода эряви. Ансяк апак учо сась тень истямо покш мель нежедемс мештезэнь цёрынень раужо принензэ, палсемс чаминензэ, пухляня ашо кеднензэ, пильгинензэ. Мон сорновтыя прям – туест нусманя арсематне – ды капшазевинь кудо ёнов. Вармакс ливтинь чуваронть ланга, мерят анеявикс вий кандсь эйсэнь тов, косо монь учость сехте малавиксэнь. Мон чиинь яла седе бойкасто ды бойкасто. Ашо чуваронть ланга ёнон ливтясь та-кодамо тюжа панкске. Сон яла малавгадсь ды малавгадсь. Мон ванынь ды эзинь кеме: каршон, гайтевстэ онгозь, чийсь Рекс. http://www.ifusco.info/ru/litkonkurs
Ответов - 1
Танюш:
полная версия страницы