Форум » Сёрмадоматев/Литература » Михаил Брыжинский » Ответить
Михаил Брыжинский
Matorchik))): Октябрянь 6-це чистэ 60 иень юбилеензэ тешксты Заслуженной писателесь, МР-нь Государственной премиянь лауреатось Михаил Иванович Брыжинский. Чачсь сон Кочкурбуе енксонь Од Мурза эрзянь велесэ тонавтыцянь семиясо. 1968 иестэ прядызе школанзо. Мордовиянь пединститутонь филологиянь факультетэнть прядомадо ды армиясто самодо мейле 1977 иестэ саезь кармась важодеме эсензэ велень школасо эрзянь келень ды литературань тонавтыцякс. М.Брыжинскиень «Половт» васенце повестьсэнзэ, кона лиссь 1983 иестэ, вельмевтевить эрзя ды мокшонь раськенть XIII пингень историясо событиятне. Невтеви кода эрзятне ды мокшотне рузтнэнь марто вейсэ тюрить монголо-татартнэнь каршо. «Ради братий своих» повестесь (1986 ие) сермадозь рузонь кельсэ. Эйсэнзэ писателесь вадрясто невтизе крестьянской войнасонть Степан Разинэнь ветямонзо ало равчирень раськетнень вейсэнь тюремаст. «Поклонись борозде» романось (1988 ие) евтни неень шкань велень стакачитнеде. Авторось парсте содасы велесэ эрямонть. Самай секс покш мель сон яви сенень, мезе тееви ломантнень оймесэ. Сермадыцясь маштозь кочкинзе событиятнень ды геройтнень. Эрямонть невти апак «мазылгавтне», ливти лангс сеть зыянтнэнь, конат ветить веленть каладомантень. Романсонть кепедезь мель, сась шка теемс од полавтомат велень хозяйствасонть. 1991 иестэ Михаил Иванович нолды «Эрямодо надобия» евтнемань пусмо, козонь совасть колмо евтнемат, «Заку-ун» триптихесь ды «Пингень гайть» эссесь. Покш мель эряви явомс «Заку-ун» триптихентень. Мордовиянь сермадыцятнень ютксо М.Брыжинский васенцекс нолдызе тевс те жанранть. Максовить колмо картинат, вейсэндязь вейке темасо, вейке идеясо, сюжетсэ. Тевесь моли вейке чи ды истя жо явозь колмо пельксэв – валске, чить ды веть. «Пингень гайть» эссесэнть сермадыцянть вановтозо каязь национальной стакачитненень. Ды, васняяк, историческойтненень. Авторось совавты зярыя исторической сведеният эрзятнень ды мокшотнень кезэрень эрямосто, панжи «мордва» валонть смустензэ, евты эсь мелензэ, кона ары каршо этносонть коряс зярыя лия вановтнэнь лангс. «Кирдажт» этнографической повестьсэнть, кона лиссь «Книга» Издательской кудосонть 2008 иестэ авторось художественной форманть вельде панжи покш «лопа» эрзянь раськенть кезэрень историясто, мель яви церынестэ церакс теевемань коентень. Юбилей марто Тынк, Михаил Иванович!
Ответов - 2
Эрзянь нилькс: Таланов эрзянь цёрась!
Matorchik))): М.И.Брыжинский: «Сермадомо кармавтымим тиринь раськенть кисэ мелявтомась» – Михаил Иванович, зярдо кундыде сермадомань тевентень ды кода чачсь оймесэнк те бажамось? – Монь васенце произведениям – «Половт» повестесь, кона лиссь 1983-це иестэ. Эйстэнзэ ушодыя творчествам. Теде икеле художественной произведеният эзинь сермале, а евтнемат, а очеркть. Эдь седе сеедьстэ эрси, писателесь ушоды сермадомо вишка жанрасто, мон жо сеске кундыть повестес. Сермадозь сон исторической темас, эйсэнзэ невтевить Пургас инязоронь шкатне. Мондень икеле теде кияк эзь сермале, те теманть кода-бути стувтокшнызь. Минек литературасо невтезь арасель, кода эрзятне стякшность монголо-татартнэнь каршо, ды аволь весть, мик колмоксть. Нама, те аволь монь панжовксось, ансяк мекс-бути весе ваксканзо теде икеле ютакшность. Седе мейле жо, кода ульнесь евтазь васенце валось, те темантень кармасть явомо мель лия писательтнеяк. Видькстан, сермадомо ушодынь тиринь раськенть кувалма мельсапаронь кирдеманть эйстэ, марилинь прям покордавозекс раськенек кисэ: эрзятне эдь аволь пакся чиресэ кадалиця видевкст, минек ули эсенек историянок. Ансяк сонзэ эряви содамс ды тонавтнемс. Невтемс аволь ансяк историктнень важодевкстнэсэ, литературасояк. Истя вана эрзятнень историяст кисэ мелявтоманть кувалма чачськак те произведениясь. – Кода мольсь лангсонзо важодемась? – Важодинь повестенть лангсо кувать, кундынь эйзэнзэ сеске институтонь прядомадо мейле. Ламо иеть пурнынь-вешнинь эрявикс материалт. Ды мейле те темантень истя совавинь, весе ютко шкам максылия. Эрявсь эдь аволь ансяк исторической материал, эрявсь содамс, кодамо сестэ ульнесь эрзятнень эрямо лувост, коест-кирдаст, кодамо пазнэнь сынь кемсть ды седе тов. Содамочитнень савсь пурнамс эрьва косто. Сеть шкатнеде ванстовсть пек аламо документальной источникть, секскак лездасть тень этнографиянь, археологиянь, мифологиянь, фольклоронь материалтнэ. Сынст коряс ламо мезесь чарькодеви, кезэрень шкатне прок одс вельмить сельметь икеле. Те важодеманть топавтомсто сынь мельс: сеть шкатнестэяк ломантне ульнесть истят жо: ульнесть мелявксост, ежомарямост, истя жо важодсть, трясть пряст, арсесть вандынь чиденть. – Михаил Иванович, кода кочкатадо произведениянк туртов тематнень? – Мон важодян истямо лувонь коряс: саян ансяк сеть тематнень, конатнень теде икеле кияк эзинзе панжокшно. Шешкезь янга-киява якамо а вечкан, секетнень мекев-васов а мезть човорямс. Сермадат эште вейке роман эли повесть седе, мезде уш сядоксть сермалесть, и мезе? Кодамо лезэнть теят? Самай секс омбоце произведениясон терявтынь невтемс литературасо истя жо апак панжо ды стувтозь образонть – Алена Арзамасскаянь. Повестенть сермадыя рузокс, лемезэ – «Ради братий своих». Алена Арзамасскаянь кисэ монень истя жо ульнесь апаро оймесэнь: раськенек кисэ аштицянть Аленань, конань пултызь тол лангсо, овсе стувтызь. Сермадозель ланганзо пек аламо, арасель покш произведения, косо бу улевель невтезь эрямозо. Те весе кармавтымимгак сермадомо. Повестесь лиссь 1986-це иестэ, тедеде сонзэ витния, кой-мезе поладынь ды нолдыя одс. Покш сюкпря евтавлинь Кочкурбуень «Норов» агрофирмантень, сон лездась книганть нолдамсто. – Ней важодтядо мезе лангсояк? Кодат арсеманк сы шкантень? – Арсематнеде байтяк. Нама, нейгак сермадан, тевтеме а аштян, ве чияк строчкавтомо монь арась. Ней важодян фантастикань жанрасо. Эсь шкасто сермадынь исторической тема лангс, реалистической, неень шкань тема лангс, а ней фантастикас ютынь. Сермадан повесть. Вишка жанрасо а маштан сермадомо. Евтнемангак весе покшт. – Михаил Иванович, тынь ламо иеть важодите школасо, тонавтыцянь тевесь веши ламо вийть ломаненть пельде, теке шкастонть явилиде покш мель творчествантень. Кода весементь кенерилиде? – Бути алкукс вечкеви те эли тона тевесь, свал муят шка ды вийть сонзэ туртов. Произведениян сермадынь тонавтоманть эйстэ ютко шкасто. Школасо важодемантькак пек вечкилия, а учовиль яла тень, зярдо прядовить кизэнь каникулатне ды таго вастован тонавтницян марто. Свал бажилинь муемс эйкакштнень марто эрявикс кель-вал. Образованиянь коряс мон – филолог, школасо ветинь тиринь кель ды литература, ансяк савкшнось ветямс ламо лия предметткак: историянть, обществознаниянть…. Бути ансяк математика марто физика эзинь ветякшно. Ней мон пенсиясан, ковкерькссэнь весе 365 читне якстереть. Седе ламо шка алтан творчествантень. Арсян кенярдовтомо ловныцян од произведениятнесэ. Ю.Камаева
полная версия страницы