Форум » Вастнема /Общение » Чачома чи марто,Эрюш Вежай!! » Ответить
Чачома чи марто,Эрюш Вежай!!
Инзейне1: Косат?Косат тон,Эрзянь Мастором? Тон монь седейсэм,ризны оймесэм. Мельсэм-седейсэм мон эйсэть кирдян, Уцяскат кисэ мелявтан-тардан!! Чачинь 1955 иень эйзюрковонь 7 чистэ Оренбург ёнксонь Ирикла велинесэ. Эрзяян. Эйкакшпингем ютась Самара ёнксонь Беднота эрзянь велинесэ. Тосо туинь школав ды прядынь 4 класст. Велиненть калавтоманзо кувалма туинек эрямо Пенза ёнксов, Пачелма станцияв. Тосо прядынь 8 класст. 15 иесэ туинь тонавлеме Свердловскоев, Суворов лемсэ ушмонь училищав. Прядыять сонзэ сырнень медаль марто 1972 иестэнть. Сеск седе тов туинь Киев ошов, косо тонавлинь Киев ошонь военно-морской политучилищасо. Прядыя сонзэ 1976 иестэнть. Лейтенант ушмолемсэ кучимизь урендямо Раужо иневедень флотов, Севастополь ошов. Ушмовенчсэ урендинь кото иеть. Мейле кучимизь тонавлеме В.И. Ленин лемсэ ушмонь академияв. Прядыя сонзэ 1985 иестэнть. Кучимизь урендеме Пелевеёнксонь флотов. Урендинь эйсэнзэ ушмовенчсэ ды штабсо 1994 прядома ковтнес. Омбоце рангсо капитан. Те шкас урендян таштавкс вийсэ (запассо). Важодян эсь тевсэм. Урендемасто туемадо мейле панжинь эсень тев. Кирдян кинигань микшнема лавка, лемезэ "Erziana". Эрюш Вежай /Ерюшов Б.А./ Весе эрямопингезэ Эрюш Вежаень сюлмавозь эрзянь раськенть марто. Ламо вийть, шка, ойме, путы Эрюш Вежай раськензэ вельмевтемантень. 1999 иестэ 300 ламо иеде мейле эрзятне васенцеде ютавтызь Раськень озксонть. Самай сон, Эрюш Вежай, васенцекс кирвастизе эрзянь Раськень штатолонть. Эрзянь паро тевензэ кис 2000 иестэ максозель тензэ А. П. Рябовонь лемсэ казнень Лауреатонь лемесь. Эри Эрюш Вежай амаласо, масторпесэ Пелеве ошсо. Кувака кинть, шканть лангс апак вано, сакшны Эрзянь Масторов ютавтомо эрзянь покш читнень. 2012 иестэ, зярдо эрзятнень эзизь нолда МАКФУН-онь VI-це Инекужов, сон, Боляень Сыресь марто, эсест ярмак лангс якасть Шиофок ошов (Мадьяронь Мастор) весе эрзянь раськень ломатнень пельде. Тосо, «Азуар» отелень конгресс-холлсо, неть кавто превей, паро эрзятне, эрзянь тешкс марто оршамосо, тетьксть Эрзянь Раськень коцт. Теке марто ёвтасть истят валт: «Эрязо эрзянь раськесь пингеде пингес!» 2013 иестэ Эрюш Вежаень эрзятне кочкизь IV-це Инекужонь топавтомакуронь прявтокс. Эрюш Вежай — «Руця»эрзянь ярмакпаргонь прявт, кона важоди 1999 иестэ саезь. Уш зяроце ие «Руця» Фондось ютавты эрзянь авань сехте мазый оршамопелень конкурс. Кочкить весемеде мазый оршамот ды казить изниця азораватненень казнеть. Эрьва иестэ Фондось нолды Эрзянь Раськень ковкерькс. Эрзянь келень чистэ Саран ошсо ютавты эрзянь сермадома шкинемань казнень максома кой. Казнетне максовить ловныцятнень мелест ванозь. А кодат мазыть, седейс токиця валморот, сермадомат сермады Эрюш, талантов ды сюпав седей марто алкуксонь эрзясь! Весе паро тевензэ, седейризксэнзэ, мелявксонзо эрзятнень кис ве чис а евтневить… Весе те сон, Эрюш Вежай, алкуксонь эрзя, паро ломань, эсь малавиксэнзэ, нуцьканзо, эрзянь раськензэ вечкиця ломань! Арсетяно Эрюш Вежайнень, сонзэ течинь покш чинзэ кувалма, кеме шумбрачи, кувака ды сюпав эрямо. Кадык весе малавиксэнзэ свал улить вакссонзо, Инешкепазось ванстозо эйсэнзэ весе эрямопингензэ перть!
Ответов - 2
Эрзянь нилькс: Инзейне1 пишет: кеме шумбрачи, кувака ды сюпав эрямо. Сюконямот!
Эрзянь нилькс: Сюконямонь вал Эрзят, ялгат! 60-нь иень топодемань кувалма састь тень 216 шумракстемат. Нама, седе ламо эрзятнень пельде, ванькс эрзянь кельсэ! Шумбракстемань перьксэсь истямо: Владивосток, Архангельск, Санкт-Петербург, Helsinki (Финляндия) , Tallinn, Тartu (Эстония), Киiв, Ужгород (Украина), Севастополь, Саранск, Самара, Пенза, Ульяновск, Тольятти, Челябинск, Красноярск… Шумбракстематне ульнесть васняяк эрзятнень пельде. Сюконямот, вечкевикс эрзят! Сюконямот рузонь, саамонь, удмуртонь, эстэнь, суоминь, украинань, русинэнь, мокшонь, американь ды лия раськень ломантненень, конатне явсть шка ды мель монь чачома чинтень. Ялгат! Тынк ойме лембенк мон марясынь васолкстнэнь пачк! Оймем-седеем витинк эсь лембе валсонк. Сюконямот эрзянь Инязоронтень, вечкевикс Пиргуж атянтень, сонгак тень гайкстась кортнимень вельде ды ёвтась оймень эждиця валт. Сюконямот минек ошонь, Полярноень (ЗАТО Александровск) прявтнэнень, конат муйсть шка явомс тень паро мелест. Арасельть шумбракстемат ансяк «мордватнень» пельде, МАФУНтнэнь, АФУНтнэнь, МККФУНтнэнь пельде. Те а ацирьгавты. Мельспаросо ды меленк ванозь, вечкевикс ялгат, тынк Эрюш Вежай, 60-нь иесэ эрзянь атя.
полная версия страницы