Форум » Вастнема /Общение » Сакшнодо инжекс Олёж велев... » Ответить
Сакшнодо инжекс Олёж велев...
chuvashon_erzja: Путыя вишкине ёвкскем. Чумом нолдынк бути мутадо ильведевкст. Кие витисынде ильведевкстнэнь-ёвтан сюкпря . Сакшнодо инжекс Олёж велев... Оймсема шкась- паро шка, теньдеяк паро оймсемс эсить чачома велесэ! Обмоце чи эрян-удан тетянь кудосонть, 15 иеть ютазь кода тетянь пазось лия ёнов тердизе-саизе, авам теме малав кавто иеть эрявсь… Улезэ стака модась сынест шождыне. Кудось умок чаво ашти, коли-коли оймсеме шкасто эсинь чачома кудоньте сован, тетянь-авань лецтясынь ды сазоронь кудос туян удомо. Тетьде совинь эрямо эсинь кудос. Монь самодо икеле, шабрасо эриця Георгий лелям кардазонть урядызе, касокшность тикшеть-пиципалакст, сынст мик пелюмасо лединьде. Кудо потмонть урядыне, тердине инжеть. Покш столекшсэ ульнесть весе эсинек ломатне, мельсэ кортнине, атятнень лецтине , седейшкава морот морыне. Валдома шка марто стинь, удомом явась, оршнинь ды лисинь кудоикелев. Чокшне човине пиземе пурксесь аламошке моданть начтызе, ней чись лиссь теевме кармась лембе. Эрявмо карми учемс кода модась коськи.Течи пурнатано молемс инжекс Толай леляйенте Олёжвелев, асфальтось минек кудонть вакс эзь пачкоде, начко сёвонев модаланга урныгайсэ ютамось стака. Чись эжди кеместэ, арсян курок килангонть костясы. Куншкачи малав килангось коштась, кармине пурнамо инжекс. Паро мельсэ молемеде икеле эряви теемс эли рамамс казьнеть. Койсэм сехте парот ярсамопелень казнеть те кшить ды калт. Костязь ды качамовтозь калтнэ эстеньгак вечкевить-сетьне монь умок анокставозь, течинь пидезь кши эряви рамамс лавкасто, минсь тесэ а пидитяно. Туине вастам ды цёрынем марто урныгайсэ Шанталав, тосо весе эрявитят казнетнень рамсемеде мейле сыргине Клявлинань трокс Олёжвелев, килангось валаня, асфальт. Олёжвелев ардан васенцеде, икеле тосо эзинь ульне, истяк содаса кона ёно-карта лангсо варштыя. Ютынь сядодо ламо вайгельпеть, килангонть вить ёндо путозь невкс “Алёшкино-3 км”, пурдыне вить ёнов. Килангось моли пандо алов, пандо ало ашти ташто велине. Асфальтось мольс веленть пес ды майш, лисинь ушов-эряви ней киньгак кевкстямс косо эри Толай леляйем. Каршо ашти артомопельсэ мазылгавтозь паро кудыне, кудонть ортатне панжадот. “Кияк кули кудосо?”, -серьгединь. Кудыкелькстэ лись тейтерьава, сон каршо рузонь кельсэ кевкстимем:- “Кого-то ищете?”. Авась невтизе моне кона ёно эри Дригань Толайесь, кудонть невтеме эзь моле, таго виздилгадсь, таго лият тевендзэ ламот ульнесть. Мон кортынь сонзэ марто эрзякс, сон чаркоди ансяк каршо корты монь марто рузонь кельсэ. Мерьсь, те веленте сакшны Похвистневосто кизна оймсеме шкасто. Теяк паро. Урныгайенть кадыне асфальтонть пес, туине ялго Толай леляйенть кудондзо вешнеме. Килангось моли тикше потмова, кавто ёндо касы сэрей кирмалав марто тикше, аволь ламо ломанть тива яксить… Вить ёндо неян кудот, сынст кардазост потс совсить урныгайень килангот, арсян те аволь Толай леляйенть кудозо, сонзэ урныгайезэ арась. Керш ёндо неяви кудыне, кудонть икеле тикшесь урныгайсэ апак тапа, молинь ды сур прясо вальмас чакадинь. Кудонть потсо марявсь кенкшень панжовома лагордомась.”Ки тосо?”?-кевкстямодо мейле лись сонсь Толай леляйесь. Эрьгедезь шумбракстныне ды кутморьдине веке-вейкенть, кармась леляйем талномо-кенердямо, кудов тердимизь ды стольекшэсь озавтымизь. Кармась эждема чай ды рестамо модамарть. Миньгак казнемек путыне стольекшэс, сеске ушодовсь мелень панжовозь калякардома-кортнема: эрямодонть коряс, Олёж веледенть… Толай леляйесь ёвлизе кода парсте ютась иесь, ламо ломанть ярмактомо сонендзэ казнесть: якшавтыця парь(холодильник), арситя машина(компьютер), телевизор спутниковой антенна марто. Истя лиси, паро ломантне минек ютксо эзть прядово, арсян колияк а прядовить. Омбоце паро куля, ней леляйень ули сотовой кортыньказо, икеле наголь сёрмань трокс сонзэ марто кортнилине, ней вана истямо тевесь кортынька марто куроксто тееви. Кудозо леляйенть аволь пек покш ды ансяк пек паро, мезе эряви весе ули: удалсь кудосонть газ нолдазь, пеньгеть а эряви керямс-лазномс. Икелсь кудосонть телевизор, арсиця ды печатыця машина. Электричествась ды газось сонедзэ лиси аволь питней. Пиресэ эрьва мезе касы, арсян стака леляйенте кирдемс покш пиренть, ансяк эстендзэ пирень эмежт види ды касты. Максь монь марто модамарть эсиндзе пирестэ-пек парт, потмост ванькст, таньтейть, курок пидивить… Койсэм атясь икелев ванозь эри, кудозо ды кардазозо ванькс, кудоикеле озавтозь цецянь паньдя-пек мазый! Кудо удало тейсь латонь кондямо вельтявкс, тосо рунгонь шумбралгавтомо тарка. Атяньте топодсь 60 иеть, ансяк кавто пондонь гирянть нейгак аволь весть кепси! Се латонть ало озадо аштезь кортнине эрзянь раскенть туртов. Ансяк шкась сась туйме, ильтимизь минек асфальтонть вакс. Максынь тенедзэ мель-вал, якшамо таркав туймеде икеле, кавто недлянь трокс омбоцеде инжекс само. Казнизе моне Ч.Журавлёвонь “Каргинеть” сборникенть. Кавто недлянь трокс омбоцеде совинь инжекс Толай леляйне, недля куншкасо гайневсь моне: “Ялавксом, коли сат? ”, мерить сан шлямочистэ ды эзинь цидярдо-сырьгинь сюконьчистэ. Самозон сон анокстазь моне казнекс эрзянь литературань пурнавкст, мекев кортазь-басязь мелемек витине стольекшсэ, мейле кортавксонть поладыне сад-пиресэ. Ёвлесь эсь прядондзо: косо чачсь, авадондо-тетяндондо, косо тонавтнесь ды важодсь, чирязонь тевтнеде… Шкась курок ютась, кармась чополгадомо, моне велявтомка эсинь велес. Ульть свал шумбра Толай леляй! Омбоце иестэ вастомазонок! Ялгат совадо инжекс Олёж велев, тосо эри паро ломань Самара ёнксонь чирязось Дригань Толай.
Ответов - 3
Семен: Самой вере фотографиясо, пандонть пря ланкс вачтак, истят минек ламо некшнинь, арсян тосо мебуди уле
chuvashon_erzja: Семен пишет: истят минек ламо некшнинь, арсян тосо мебуди уле Монгак истя арсян, минек велесь истяможо пандоало ашти. Минек пандопрястонть саить кев ды сёвонь. Сёвонесь кавто тюссо: якстере ды ашо. Арсян, кевтне ды ашо сёвонесь теевсь кода пандось ульнесь иневедь ало, якстересь теевсь теде мейле. Минек пандонть лансо касы тумопуло, пандобоканть сюросо видьнить-те таркась раужомода. Пандобокась (кувалмова) лембеёнксов ваны, пандоалга чуди вишкине лейне, лемезе Яурка. Тельня вадря пандопрясто сокссо кирякстнемс. Толай лелянть нать истяжо лиси, пандо алга чуди вишка лейне. Кода омбоцеде совинь сонензэ инжекс, кудозо ульнесь пекстазь. Мон виевстэ сергединь тенензэ: "Леляй, тон косоят?", мария васолдо вайгелензэ: "Тесэян, лей чиресэ". Молинь каршо ды неия лейненть. Мейле неявсь Толай леляйесь калонь кундамка кечказ марто. Сон ялгандо марто кундась малав пель кастрюля човаркат, минек велесэ сынест мерить модарька(пескарь). Пандопотмонь геологиянть ды археологиянть паро бу улевель содамс. Койсэм, минек атятне-покштятне истят таркатнень лангс эрямо састь аволь истяк -ульнесть превейть ды модань лангсо важодеме маштыцят.
Эрзянь нилькс: chuvashon_erzja пишет: Ялгат совадо инжекс Олёж велев, тосо эри паро ломань Самара ёнксонь чирязось Дригань Толай. Сюконян, Оло, пек паро сёрмадксоськак, фотокувотнеяк!
полная версия страницы